Presidenti Volodymyr Zelensky u bëri thirrje aleatëve të Ukrainës këtë të mërkurë që të sigurojnë mbështetje për Kievin dhe t’i tregojnë Rusisë se vazhdimi i luftës është “i pakuptimtë”, përpara samitit vendimtar të Bashkimit Evropian mbi asetet e ngrira të Moskës.
“Rezultati i këtyre takimeve, rezultati për Evropën, duhet të jetë i tillë që Rusia të ndiejë se dëshira e saj për të vazhduar luftën vitin e ardhshëm do të jetë e pakuptimtë, sepse Ukraina do të ketë mbështetje,” tha Zelensky në fjalimin e tij të mbrëmjes.
Ai u bëri thirrje partnerëve të Ukrainës të marrin një vendim për përdorimin e gati 250 miliardë dollarëve të aseteve sovrane ruse të ngrira në Bashkimin Evropian, shumica e të cilave mbahen në Euroclear të Belgjikës, për të mbështetur një hua për Ukrainën.
Qeveritë e BE-së ranë dakord javën e kaluar që asetet të mbeten të ngrira për aq kohë sa të jetë e nevojshme, në vend që të votojnë çdo gjashtë muaj për zgjatjen e këtij statusi. Disa liderë evropianë e kundërshtuan planin, duke u shprehur se mund t’i ekspozojë ndaj rrezikut ligjor.
“Na duhen të gjithë partnerët tanë të kenë guximin të shohin të vërtetën, ta pranojnë të vërtetën dhe të veprojnë në përputhje me të,” tha Zelensky, citon Reuters. Ai shtoi se Rusia, me veprimet e saj, po tregon se synon të vazhdojë luftën vitin e ardhshëm.
“Aleatët në Shtetet e Bashkuara shpesh thonë se Rusia duket sikur dëshiron ta përfundojë luftën. Por Rusia po dërgon retorikë dhe sinjale krejtësisht të ndryshme, duke përfshirë urdhra zyrtarë për ushtrinë e saj.”, shtoi presidenti ukrainas.
Në Moskë të mërkurën, presidenti Vladimir Putin tha se Rusia do të merrte më shumë tokë në Ukrainë me forcë nëse Kievi dhe politikanët evropianë, të cilët ai i quajti “derrkucë të rinj”, nuk do të angazhoheshin mbi propozimet amerikane për një marrëveshje paqeje.