Kreu i Grupit Parlamentar të Partisë Socialiste, Taulant Balla, ka reaguar pas operacionit të policisë që çoi në arrestimin e dy të rinjve, të dyshuar se tentuan t’i merrnin 100 mijë euro presidentit të FSHF-së, Armand Duka, duke u prezantuar pikërisht si Balla.
Por kreu i grupit socialist e ka zhvendosur menjëherë reagimin te kryetari i Partisë Mundësia, Agron Shehaj, i cili e akuzoi drejtpërdrejt sot.
Në një postim të ashpër, Balla e quan Shehajn “mashtruesin më të madh të call center-ave”, e akuzon për vjedhje të të dhënave dhe e mbyll reagimin me një paralajmërim të drejtpërdrejtë: pas personave që policia arrestoi sot, sipas tij, “radhën” e ka Shehaj.
“Ju kam thënë shpesh për këtë palaço se është mashtruesi më i madh i call centrave. Të vjedhin duke të marrë në telefon! I dënuar për vjedhje të dhënash. Gone pas këtyre mashtruesve që Policia arrestoi sot, e ke radhën ti!”, shkruan Balla.
Deklarata vjen pas zbulimit të një skeme mashtrimi, në qendër të së cilës ishte presidenti i Federatës Shqiptare të Futbollit, Armand Duka.
Sipas të dhënave të bëra publike për operacionin, dy të rinjtë Edison Korra, 24 vjeç, dhe Orest Balla, 23 vjeç, dyshohet se kontaktuan Dukën përmes aplikacionit “Signal”. Në komunikim ata u prezantuan si Taulant Balla dhe i kërkuan kreut të FSHF-së 100 mijë euro.
Fillimisht, shuma prej 100 mijë eurosh iu kërkua në kriptomonedha. Duka dyshoi se pas komunikimit fshihej një mashtrim dhe vuri në dijeni policinë.
Gjatë vijimit të komunikimeve, Duka u tha personave që të flisnin me djalin e tij, me argumentin se ai nuk merrej me kriptomonedha. Në këtë fazë në operacion u përfshi policia.
Një agjent i infiltruar u paraqit si djali i Armand Dukës dhe vijoi komunikimet me personat që kërkonin paratë. Ai u tha se nuk mund t’ua siguronte shumën në kriptomonedha, por se 100 mijë eurot mund t’ua dorëzonte cash.
Dorëzimi i parave u organizua në Elbasan. Kur personat e dyshuar shkuan për të marrë shumën, policia ndërhyri dhe realizoi arrestimet.
Hetimet vijojnë për të zbardhur të gjithë mekanizmin e skemës dhe rolin e personave të tjerë që mund të kenë qenë të përfshirë.
Në këtë histori është rikthyer edhe emri i Florian Gjergjit, i përmendur edhe në raste të mëparshme mashtrimesh ku janë përdorur identitetet e personazheve publikë për t’u kërkuar shuma të mëdha parash biznesmenëve.
Edhe emri i Taulant Ballës është përdorur më parë në një skemë të ngjashme. Në vitin 2024, një biznesmen në Përrenjas denoncoi se ishte kontaktuar nga një person që prezantohej si Balla dhe i kërkonte urgjentisht 100 mijë euro. Biznesmeni shkoi drejt Tiranës me paratë, ndërsa çanta me shumën iu dorëzua një taksisti.
Operacioni i sotëm ka sjellë tashmë edhe një përplasje të fortë politike.