Ministri i Turizmit, Kulturës dhe Sportit, Blendi Gonxhja, ka zgjedhur një mënyrë të veçantë për të justifikuar 4.2 milionë eurot e shpenzuara për koncertin e Kanye West në Shqipëri: sipas tij, shteti jo vetëm që nuk humbi para, por doli edhe me fitim.
Në një intervistë, Gonxhja deklaroi se vetëm taksat direkte të gjeneruara nga aktiviteti ekonomik gjatë ditëve të koncertit kanë sjellë mbi 6 milionë euro në arkën e shtetit.
Pra, sipas kësaj llogarie, 4.2 milionë euro u shpenzuan për eventin dhe më pas shteti mori mbi 6 milionë euro nga taksat. Një bilanc që në pamje të parë tingëllon si një histori suksesi financiar. Por pikërisht këtu nis pyetja: a mund të quhen të gjitha këto 6 milionë euro “fitim” nga koncerti?
Taksat e mbledhura nga hotelet, restorantet, transporti dhe aktivitetet e tjera ekonomike nuk janë automatikisht të ardhura që i atribuohen tërësisht koncertit. Për të nxjerrë një bilanc real, do të duhej të përcaktohej se sa prej këtij qarkullimi ekonomik nuk do të kishte ndodhur pa eventin dhe sa prej tij lidhet drejtpërdrejt me fondet publike të përdorura.
Megjithatë, ministri e sheh ndryshe.
“Po, për 4-5 ditë pas atij shpenzimi, paratë u rikthyen në arkat e shtetit”, deklaroi Gonxhja, duke e paraqitur organizimin e koncertit si një investim që e justifikoi veten ekonomikisht.
Në këtë version të llogarisë, mjafton të shpenzosh 4.2 milionë euro dhe të mbledhësh më shumë se 6 milionë euro taksa që bilanci të quhet pozitiv. Por matematika ekonomike kërkon pak më shumë se kaq: sa ishte qarkullimi shtesë, sa ishin taksat që erdhën realisht nga koncerti dhe sa prej tyre do të arkëtoheshin gjithsesi nga aktiviteti normal turistik?
Për momentin, ministri jep shifrën e madhe të mbi 6 milionë eurove. Ajo që mbetet për t’u parë është llogaria e plotë pas saj.
Në fund, pyetja nuk është vetëm nëse koncerti solli aktivitet ekonomik. Pyetja është nëse 4.2 milionë eurot e parave publike ishin të domosdoshme për të gjeneruar atë aktivitet dhe sa ishte realisht kthimi neto për shtetin.