Trupat ukrainase janë tërhequr nga qyteti lindor i Siverskut, ndërsa Rusia vazhdon përparimin e saj të qëndrueshëm, megjithëse të ngadaltë.
Ushtria ukrainase tha këtë të martë se veproi “për të ruajtur jetët e ushtarëve tanë dhe aftësinë luftarake të njësive”, duke shtuar se forcat ruse kishin një “avantazh të konsiderueshëm në numër”.
BBC shkruan se marrja e Siverskut e afron Rusinë më pranë qyteteve të fundit të mbetura në duart e Ukrainës, Slovianskut dhe Kramatorskut, në rajonin industrial të Donetskut.
Më herët gjatë ditës, zyrtarët thanë se tre persona, përfshirë një fëmijë të vogël, u vranë nga sulmet masive me dronë dhe raketa të Rusisë gjatë natës.
Rusia nisi pushtimin e plotë të Ukrainës në shkurt 2022 dhe aktualisht kontrollon rreth 20% të territorit ukrainas.
Në një deklaratë, ushtria ukrainase tha se trupat ruse po vazhdonin “veprime aktive sulmuese” në zonën e Siverskut “pavarësisht humbjeve të mëdha”. Ajo shtoi se “forcat mbrojtëse të Ukrainës e kishin lodhur armikun gjatë luftimeve për Siverskun”.
Para pushtimit rus, Siversku kishte rreth 11 mijë banorë. Dy javë më parë Rusia kishte raportuar se e kishte marrë qytetin nën kontroll, por Ukraina e kishte mohuar pretendimin në atë kohë. Siversku është shkatërruar pothuajse tërësisht si qytet pas muajve të gjatë të luftimeve të ashpra.
Moska aktualisht kontrollon rreth 75% të rajonit të Donetskut dhe rreth 99% të rajonit fqinj të Luhanskut. Këto rajone njihen së bashku si Donbas.
Presidenti rus Vladimir Putin ka paralajmëruar vazhdimisht se trupat ukrainase duhet të tërhiqen nga i gjithë Donbasi ose Rusia do ta pushtojë atë, duke refuzuar çdo kompromis për përfundimin e luftës.
Presidenti ukrainas Volodymyr Zelensky është nën presion të madh nga homologu i tij amerikan Donald Trump për t’ia dorëzuar Rusisë të gjithë Donbasin gjatë negociatave të paqes të udhëhequra nga Washingtoni. Deri tani, Zelensky ka refuzuar çdo lëshim territorial dhe ka kërkuar garanci të forta sigurie për Ukrainën në çdo marrëveshje të mundshme.
Negociatat e paqes, që përfshijnë takime të ndara të zyrtarëve amerikanë me homologët ukrainas dhe rusë, vazhduan gjatë fundjavës, por pa ndonjë përparim. Sipas Zelensky-t, SHBA kishte propozuar një armëpushim për Krishtlindje, por Rusia e refuzoi idenë.
Gjatë natës, Rusia lëshoi 635 dronë dhe 38 raketa mbi disa rajone të Ukrainës, tha forca ajrore ukrainase, duke shtuar se 621 prej tyre u rrëzuan.
Autoritetet lokale në rajonin qendror Zhytomyr konfirmuan vdekjen e një fëmije. Kreu rajonal Vitaly Bunechko tha se fëmija “u dërgua në spital, mjekët luftuan për jetën e tij por nuk arritën ta shpëtonin”. Pesë persona të tjerë u plagosën në sulm.
Ndërkohë, një grua 76-vjeçare u vra dhe tre persona u plagosën kur një shtëpi në rajonin e Kievit u godit, sipas shërbimit të emergjencave të Ukrainës. Një sulm tjetër në Khmelnytsky, në Ukrainën perëndimore, vrau një 72-vjeçar, tha kreu i administratës rajonale Serhiy Tyurin.
Avionë luftarakë polakë u ngritën në ajër si përgjigje ndaj raketave dhe dronëve që synonin Ukrainën perëndimore.
Ministria e Mbrojtjes së Rusisë tha se kishte goditur “uzina të kompleksit ushtarako-industrial të Ukrainës dhe objekte energjetike mbështetëse”, duke shtuar se të gjitha objektivat e përcaktuara ishin goditur. Ndërkohë, Ukraina raportohet se ka goditur një uzinë petrokimike në Stravropol, në Rusinë jugore.