Në vitin 2026, për shkak të çmimeve më të ulëta të energjisë, do të ketë një ulje të mëtejshme të inflacionit në Eurozonë, në 1.9% nga 2.1% këtë vit. Sipas parashikimeve të ekspertëve të Bankës Qendrore Evropiane, BQE, parashikohet që çmimi mesatar i naftës Brent të bjerë më tej në 62.5 dollarë për fuçi mesatarisht në vitin 2026, nga 69.2 dollarë në vitin 2025. Po ashtu, edhe çmimi i gazit natyror në tregun e Amsterdamit do të bjerë në 29.6 euro për megavat-orë, nga 36.5 euro në vitin 2025.
Ulja e çmimit të gazit natyror këtë vit të ri pritet të ndikojë edhe tek ulja e çmimeve me shumicë të energjisë elektrike, që parashikohet të jetë 75 euro për megavat-orë, nga 83.9 euro. Për çmimet e ushqimeve, BQE-ja pret që rritja të ngadalësohet në 2% në vitin 2026. BQE-ja përqendron vëmendjen e saj edhe në rritjen e çmimeve të shërbimeve, e cila arriti në 3.5% në bazë vjetore. Për ekonominë e Eurozonës në tërësi, kompensimi për punonjës po rritet me një normë mesatare vjetore prej 4% këtë vit, e cila pritet të ngadalësohet gradualisht në vitin 2026.
BQE-ja e rishikoi parashikimin e saj të rritjes për vitin 2026 në 1.2%, nga 1% që pritej në muajin shtator, pasi eksportet i rezistuan luftës tarifore të SHBA-së dhe, të kombinuara me rritjen e kërkesës së brendshme, çuan në një rritje të PBB-së prej 1.4% në tremujorin e tretë. Konsumi familjar po mbështetet nga rritja më e lartë e pagave, me papunësinë që luhatet pranë niveleve historike të ulëta, pak mbi 6%.
BQE-ja vlerëson se norma mesatare e tarifave për eksportet evropiane në SHBA ra më tej pas marrëveshjes së korrikut – e cila parashikoi një normë prej 15% për shumicën e produkteve të BE-së – në 12.1% nga 13.1%, ndërsa norma mesatare e tarifave për të gjitha importet në SHBA ra nga 20.1% në 18.6%.