Nick, djali i Rob dhe Michele Reiner, është akuzuar për dy vepra vrasjeje të shkallës së parë për therjen me thikë të prindërve të tij.
Njoftimi vjen nga një konferencë për shtyp nga avokati i Distriktit të Los Anxhelesit, Nathan Hochman dhe shefi i policisë, Jim McDonell.
“Jam këtu sot për të njoftuar se zyra jonë do të ngrejë akuza kundër Nick Reiner, i cili akuzohet për vrasjen e prindërve të tij. Janë dy akuza për vrasje të shkallës së parë me një rrethanë të veçantë vrasjeje të shumëfishtë. Ai përballet edhe me një pretendim të veçantë se përdori personalisht një armë të rrezikshme dhe vdekjeprurëse, një thikë. Këto akuza mbartin dënim maksimal me burgim të përjetshëm pa mundësinë e lirisë me kusht”, tha Hochman para se të shtonte se ai mund të përballet edhe me dënimin me vdekje.
Megjithatë, ai theksoi se nuk është marrë ende “asnjë vendim” dhe Zyra e Avokatisë të Distriktit të Los Anxhelesit do të marrë “ në konsideratë mendimet dhe dëshirat e familjes” para se të vendosë për këtë.
Nick ndodhet në paraburgim pa mundësinë e daljes përmes garancisë dhe po ekzaminohet nga ana mjekësore. Më vonë do të dalë para gjykatës.
Hochman tha se çdo provë lidhur me sëmundje mendore do të paraqitet në gjykatë.
McDonnell falënderoi departamentin për reagimin e shpejtë dhe ngushëlloi të afërmit e Rob dhe Michele Reiner.
Çifti u gjet i therur në fyt me thikë në vilën e tyre.
Përpara vrasjes së tmerrshme, Nick ishte grindur me prindërit e tij dhe Bill Hader në festën e Conan O’Brien. Sipas burimeve të mediave të huaja, Nick u largua me rrëmbim pasi komediani i tha se ishte duke bërë një bisedë private.
32-vjeçari kishte pasur probleme me dhunën dhe varësinë nga droga që në adoleshencë. Barry Markowitz, bashkëpunëtor dhe mik i Rob Reiner, tha se regjisori i ndjerë “nuk ishte trembur kurrë për sigurinë e vet” dhe ishte përpjekur shumë që ta ndihmonte të birin.
