3 vëllezër janë shpallur në kërkim, pasi akuzohen se janë autorët e mbjelljes së disa parcelave me kanabis në pyjet e Shkodrës. Pas monitorimit të territorit me dron, policia identifikoi disa parcela me kanabis mes pyjeve në fshatin Rrjoll, në vendin e quajtur “Maja e Zezë”.
Efektivët asgjësuan 24 759 bimë kanabisi, ndërsa shpalli në kërkim vëllezërit M. N., 30 vjeç, P. N., 36 vjeç, dhe L. N., 32 vjeç, të tre banues në fshatin Rrjoll.
Gjithashtu në hetim në gjendje të lirë janë edhe dy punonjës të OSHEE, pasi sipas efektivëve nuk konstatuan lidhjen e paligjshme të energjisë elektrike që ishte krijuar për kultivimin e kanabisit.
Nën hetim janë T. Sh., 61 vjeç, dhe P. M., 61 vjeç, të dy banues në Velipojë, punonjës të OSHEE-së, për veprën penale “Shpërdorimi i detyrës”.
Vijon puna për identifikimin, kapjen dhe nxjerrjen përpara përgjegjësisë penale, të shtetasve të tjerë të implikuar në këtë veprimtari kriminale.
/a.r
