Raketa balistike ruse Oreshnik, e aftë të mbajë koka bërthamore, ka nisur të vendoset në territorin e Bjellorusisë që nga dita e djeshme, e mërkurë, njoftoi presidenti bjellorus Aleksandër Lukashenko, aleat i ngushtë i Rusisë. Deklarata u bë gjatë konferencës vjetore për shtyp në Minsk.
“Oreshnik ndodhet në Bjellorusi që nga dje (e mërkurë) dhe është vendosur në gatishmëri luftarake”, deklaroi Lukashenko. Bjellorusia, ish-republikë sovjetike, ishte një nga territoret nga të cilat Moska nisi sulmin ndaj Ukrainës në shkurt të vitit 2022.
Në muajin gusht, presidenti rus Vladimir Putin kishte njoftuar se Rusia kishte filluar prodhimin masiv të kësaj rakete të gjeneratës së fundit, e aftë të mbajë koka bërthamore, duke shtuar se Moska mund ta vendoste atë në Bjellorusi deri në vitin 2025.
Nga ana e saj, Minsku kishte lënë të kuptohej në gusht se stërvitjet e përbashkëta ushtarake me Rusinë, të zhvilluara në shtator, do të përfshinin edhe raketat Oreshnik – term që në rusisht do të thotë “lajthi”.
Këto stërvitje të përmasave të mëdha shkaktuan shqetësim mes vendeve anëtare të NATO-s, vetëm disa ditë pas hyrjes së paprecedentë të dronëve të dyshuar rusë në territorin polak.
Në nëntor të vitit 2024, Rusia përdori për herë të parë raketën Oreshnik, pa kokë bërthamore, për të bombarduar një fabrikë ushtarake në qytetin Dnipro, në Ukrainën qendrore.
