Papa Leone XIV u kthye në Bazilikën e Shën Pjetrit mëngjesin e së enjtes për të kremtuar Meshën e Ditës së Krishtlindjeve, vetëm disa orë pas Meshës së Mesnatës. Ky kremtim shënoi një ndryshim pasi që nga viti 1994, një Papë nuk i kishte kremtuar të dyja ritet e Krishtlindjeve në Shën Pjetër.
Apeli i fortë për dinjitetin njerëzor dhe kritika ndaj modeleve ekonomike kapitaliste ishin në fokus të predikimit të mbajtur nga Papa Leone XIV. Ati i Shenjtë u përqendrua në nevojën për t’u përkushtuar ndaj lehtësimit të vuajtjeve njerëzore, duke përmendur Gazën, regugjatët dhe konfliktet në botë.
“Vëllezër dhe motra të dashur, që kur Fjala u bë mish, tani mishi flet, thërret dëshirën hyjnore për të na takuar. Fjala ka ngritur tendën e saj të brishtë midis nesh. Dhe si mund të mos mendojmë për tendat në Gaza, të ekspozuara për javë të tëra ndaj shiut, erës dhe të ftohtit , dhe ato të kaq shumë refugjatëve dhe personave të zhvendosur në çdo kontinent, ose për strehimet e improvizuara të mijëra njerëzve të pastrehë brenda qyteteve tona?”, tha Papa.
Paqja është e mundur, theksoi ai, duke kujtuar se është dhurata e Mishërimit që festojmë në Krishtlindje.
“Do të ketë paqe kur monologët tanë të ndalojnë dhe, të ushqyer nga dëgjimi, të biem në gjunjë para mishit të zhveshur të të tjerëve. Është një fuqi e vërtetë ajo e të bërit bij të Zotit : një fuqi që mbetet e varrosur për sa kohë që jemi të shkëputur nga të qarat e fëmijëve dhe brishtësia e të moshuarve, nga heshtja e pafuqishme e viktimave dhe melankolia e dorëzuar e atyre që bëjnë të keqen që nuk e kanë ndërmend”, shtoi Papa.
Prevost citoi më pas Papa Françeskun, duke thënë:
“Ndonjëherë ndiejmë tundimin për të qenë të krishterë, duke mbajtur një distancë të kujdesshme nga plagët e Zotit. Por Jezusi dëshiron që ne të prekim mjerimin njerëzor, të prekim mishin që vuan të të tjerëve. Ai pret që ne të heqim dorë nga kërkimi i atyre strehimeve personale ose të përbashkëta që na lejojnë të mbajmë distancën tonë nga thelbi i dramës njerëzore, në mënyrë që të mund ta pranojmë vërtet kontaktin me ekzistencën konkrete të të tjerëve dhe të njohim fuqinë e butësisë.”
Papa i uroi botës Krishtlindje të gëzuara në italisht, frëngjisht, anglisht, gjermanisht, spanjisht, portugalisht, polonisht, arabisht, kinezisht dhe latinisht.