Ish kandidati për kryetar të Partisë Demokratike, Fatbardh Kadilli thotë se opozita ende nuk ka një projekt.
Në një intervistë për “Tirana Live” në ABC News, Kadilli u shpreh se në opozitë ka figura të konsumuara, që kanë 30 vite në politikë.
Sipas Kadillit, shqiptarët kanë nevojë për një gjë të re. Lidhur me protestën e thirrur nga Sali Berisha më 11 korrik, Fatbardh Kadilli e cilësoi një demostrim për të treguar se sa njerëz mund të mbledhë.
Për mundësinë që Lulzim Basha të bëjë parti të re, Kadilli nënvizoi se edhe kjo nuk pritet të sjellë diçka të re.
“Mbas kësaj qetësie do vazhdojë një rutinë. Grindja që kishim, u mbyll, rëndësi ka që u mbyll dhe opozita nuk do shpenzojë më energji për t’u marrë me një betejë të pakuptimtë. Një forcë politike nuk ka pengesë ligjin, ka aksion politik dhe besueshmërinë që krijon.
Nuk të pengon mungesa e vulës, apo flamurit, nëse ke vendosur të bësh politikë. Nuk e ndihmoi zotin Basha vula për të hyrë në garë, nuk e pengoi zotin Berisha. Politika është përtej grindjeve të vogla, por u shpenzuan shumë energji.
Këto energji do ishin mirë të shpenzoheshin në një projekt opozitar, që ende nuk e kemi. Kam bindjen që pala që e quan veten fituese, do hyjë në rutinën politike të një partie në opozitë, në komoditet me zotërimin e asaj pjesë të politikës që e quan të vetët.
Nuk është çështje kohe, jo një vit, 10 vjet po t’i japësh, do ripridhojnë të njëjtën gjë. Nuk besoj se janë të paditur se çfarë kanë zgjedhur, por ëndrra e tyre është që në fund të zgjedhjeve të ardhshme ta shohin veten në karrigen e deputetit. Në modelin që i rri nga mbrapa kryetarit të fortë.
Ky model politik është faliment mendor, moral për atë që hyn dhe mendon se po bën politikë. Një protestë kur më shumë digjen goma, se sa ka prezencë njerëzore. Nuk është protestë. Protesta lind nga nevoja, njeriu reagon. Nëse cakton datë, si një dasëm, kjo nuk është protestë, është demonstrim.
Unë jam i zoti të mbledh kaq njerëz. Asgjë e re nuk mund të vijë në politikë nga njerëz që kanë 30 vjet. Surprizë mund të presësh nga një njeri që nuk e ke parë. Kanë 30 vite në sytë e shqiptarëve nga mëngjesi nëd arkë. Shqiptarët presin gjë të re. As partia e Bashës. Emri Basha dhe folja do të bëj, nuk qëndrojnë në një fjali”, theksoi ai.
/a.r