Qendra Kombëtare Meteorologjike e Kinës të mërkurën në mbrëmje lëshoi një alarm portokalli për temperaturat e larta, pasi rajone të shumta në vend po përjetojnë valë të nxehti.
Gjatë ditës së sotme, disa zona në Shaanxi, Shanxi, Pekin, Tianjin, Hebei, Shandong, Henan, Jiangsu, Anhui, Hubei, Xinjiang, Guangdong, Guangxi dhe Hainan pritet të kenë temperatura deri në 35 gradë Celsius, sipas qendrës.
Disa zona madje mund të përjetojnë temperatura përvëluese midis 40 dhe 42 gradë, bën të ditur “Xinhua”.
Qendra paralajmëroi se aktivitetet në natyrë duhet të shmangen gjatë temperaturave të larta dhe duhet të merren masa paraprake për të mbrojtur grupet e cenueshme, si fëmijët dhe të moshuarit.
Kina ka një sistem paralajmërimi me tre nivele për temperaturat e larta, ku e kuqja përfaqëson paralajmërimin më të rëndë, e ndjekur nga portokallia dhe e verdha.