Një stuhi e fortë bore goditi verilindjen e Shteteve të Bashkuara, duke shkaktuar kaos në transportin publik. Autoritetet në Nju Jork dhe Nju Xhersi shpallën gjendje emergjence, ndërsa trafiku ajror dhe hekurudhor u përball me vonesa dhe anulime të shumta.
Në Stacionin Penn në Nju Jork, qindra udhëtarë mbetën në pritje për orë të tëra, pasi shërbimet u ndërprenë për shkak të dëmtimit të linjës.
“Shumica e njerëzve thjesht presin. Në tabelë shfaqen shumë trena, por vetëm një tregon nisjen e saktë. Duhet të gjesh një vend të rehatshëm dhe të presësh njoftimin, i cili mund të vijë në çdo moment, edhe pak para nisjes së trenit“, u shpreh një pasagjer.
Pamjet tregojnë pasagjerë të ulur në dysheme, radhë të gjata udhëtarësh duke kërkuar informacion për udhëtimin e tyre.
“Ne ishim në një tren në orën tre dhe na thanë se kishte një linjë energjie të rrëzuar diku në Nju Ingland. Na kaluan në një tren tjetër në orën pesë. Në fund, jemi vetëm paksa të vonuar“, u shpreh një pasagjer.
Në Boston, në Stacionin South Station, udhëtarët u panë duke nxituar drejt ekraneve të nisjeve dhe duke pritur në radhë të gjata për të hipur në trena, ndërsa disa të tjerë prisnin të ulur në dysheme.
Sipas Shërbimit Kombëtar Meteorologjik, nga 15 deri në 25 centimetra borë ranë në zona të mëdha nga Nju Jorku qendror deri në Long Island.
Autoritetet u bënë thirrje qytetarëve të shmangin udhëtimet e panevojshme, ndërsa mijëra fluturime u anuluan ose u vonuan në të gjithë rajonin verilindor të Shteteve të Bashkuara.