Kryeministri i Spanjës, Pedro Sánchez, i goditur nga kriza politike, përballet këtë të dielë me një provë të rëndësishme kur votuesit në rajonin jugperëndimor të Extremadura do të hedhin votën në zgjedhjet e para të mëdha që zhvillohen pas një serie akuzash për korrupsion dhe ngacmime seksuale që kanë përfshirë rrethin e tij të ngushtë, partinë dhe administratën.
Extremadura, dikur bastion i Partisë Socialiste të Punëtorëve të Spanjës (PSOE), që drejtohet nga Sánchez, është nën kontrollin e Partisë Popullore (PP) që prej vitit 2023, kur konservatorët arritën të formonin një koalicion të shkurtër me partinë e ekstremit të djathtë Vox, pavarësisht se përfunduan pas socialistëve në vota.
Zgjedhjet e parakohshme të së dielës u shpallën dy muaj më parë nga presidentja rajonale, María Guardiola, pasi PSOE dhe ish-aleatët e saj në Vox rrëzuan buxhetin e vitit të ardhshëm.
The Guardian shkruan se edhe pse formalisht janë zgjedhje rajonale, rezultatet pritet të kenë ndikim përtej Extremadura-s. Politikanët dhe analistët do të vëzhgojnë me kujdes për të parë sa dëme i kanë shkaktuar PSOE-së akuzat e javëve dhe muajve të fundit, ndërsa PP ka gjasa të detyrohet sërish të bëjë marrëveshje me Vox për të qeverisur.
Kandidati socialist, Miguel Ángel Gallardo, po përballet me gjyq për ushtrim ndikimi dhe abuzim me detyrën, mbi akuza se kishte ndihmuar në krijimin e një posti të posaçëm për vëllain e kryeministrit, David Sánchez, tetë vite më parë. Çështja buron nga një ankesë e sindikatës së vetëshpallur Manos Limpias (Duart e Pastra), e lidhur me ekstremistët e djathtë, e cila ka një histori të gjatë përdorimi të gjykatave për të ndjekur ata që i konsideron të dëmshëm për interesat demokratike të Spanjës.
Gallardo dhe David Sánchez, që përballen me të njëjtat akuza, i kanë mohuar ato. Rasti është një nga shumë të tjerë që kanë dëmtuar imazhin e kryeministrit, i cili erdhi në pushtet në vitin 2018 duke premtuar fundin e korrupsionit.
Bashkëshortja e Sánchez-it, Begoña Gómez, është akuzuar se ka përdorur ndikimin e saj për të siguruar sponsorë për një program master universitar që drejtonte dhe se ka përdorur fonde shtetërore për të paguar asistenten e saj për çështje personale. Ajo i ka mohuar akuzat, ndërsa hetimi gjyqësor aktual është gjithashtu rezultat i një ankese nga Manos Limpias.
Në qershor, Sánchez urdhëroi dorëheqjen e dorës së tij të djathtë, Santos Cerdán, nga posti i sekretarit organizativ të PSOE-së, pasi një gjykatës i Gjykatës së Lartë gjeti “prova të forta” për përfshirjen e tij në marrjen e ryshfeteve mbi kontrata publike për pajisje sanitare gjatë pandemisë së Covid-it. Ish-ministri i transportit, José Luis Ábalos, dhe ish-asistenti i tij, Koldo García, janë gjithashtu të akuzuar për përfshirje në këtë aferë. Të tre i kanë mohuar akuzat.
Në javët e fundit, PSOE është akuzuar se ka dështuar të trajtojë rastet e ngacmimeve seksuale nga figura të larta brenda partisë. Akuzat janë veçanërisht dëmtuese duke pasur parasysh se Sánchez, kur hyri në pallatin Moncloa shtatë vite më parë, kishte deklaruar se PSOE ishte “pa mëdyshje e përkushtuar ndaj barazisë” dhe pasqyrimit të ndryshimeve në shoqërinë spanjolle.
PP ka shfrytëzuar situatën. Lideri i saj, Alberto Núñez Feijóo, ka thënë se shpreson që zgjedhjet rajonale të së dielës të nisin një “efekt domino” që do të rrëzojë Sánchez-in dhe do të shpëtojë Spanjën nga ajo që e quan “moçal korrupsioni, seksizmi dhe shantazhi”.