Kina vendos një TVSH prej 13% për prezervativët dhe kontraceptivët, si pjesë e një përpjekjeje për të rritur shkallën e lindjeve, duke provokuar reagime të forta.
Në një veprim që po shkakton debate brenda dhe jashtë vendit, Kina po përgatitet të vendosë një taksë mbi prezervativët dhe kontraceptivët për herë të parë në tre dekada, si pjesë e përpjekjeve të saj për të trajtuar një popullsi në tkurrje.
Nga 1 janari 2026, këto produkte do t’i nënshtrohen një TVSH-je prej 13%, duke i dhënë fund një regjimi të përjashtimit nga taksat që ka qenë në fuqi që nga viti 1993.
Masa është pjesë e një ligji të ri për TVSH-në, të miratuar në vitin 2024 me qëllim modernizimin e sistemit tatimor. Megjithatë, nuk kalon pa u vënë re fakti që përkon me ankthin e vazhdueshëm të Pekinit për një rënie të nivelit të lindjeve dhe një popullsi në plakje.
Në vitet e fundit, pas përfundimit të politikës së një fëmije dhe rritjes në tre fëmijë për çift, qeveria kineze ka vendosur një sërë stimujsh: përfitime financiare, fertilizim in vitro të subvencionuar, më shumë ditë leje martesore dhe masa për të inkurajuar martesën dhe formimin e familjes.
I njëjti ligj madje ofron lehtësime tatimore për shërbimet e kujdesit për fëmijët dhe madje edhe për platformat e takimeve.
Megjithatë, vendimi për të taksuar kontraceptivët ka shkaktuar komente tallëse në mediat sociale, me përdoruesit e Weibo që e quajnë atë “masa ekstreme” dhe shprehin ndjenjën se shteti po përpiqet të ndërhyjë edhe më drejtpërdrejt në zgjedhjet personale të qytetarëve.
Shqetësimet po shtohen nga ankesat e grave në disa zona, të cilat raportojnë telefonata nga zyrtarët lokalë që i pyesin në lidhje me ciklet e tyre menstruale dhe planet për lindjen e fëmijëve. Në provincën Yunnan, u raportua se grave iu kërkua të deklaronin datën e ciklit të tyre të fundit, me autoritetet që përmendën arsye të shëndetit publik.
Pavarësisht presioneve dhe stimujve, rezultatet mbeten të kufizuara. Në vitin 2024, shkalla e lindjeve ishte 6.77 për 1,000 banorë, pak më e lartë se në vitin 2023, por larg niveleve që mund të përmbysnin krizën demografike me të cilën përballet vendi.
Kina ka aktualisht një popullsi pak më shumë se 1,4 mld banorë dhe kryeson listën së bashku me Indinë, po në të njëjtën shifër.
