Një fluturim i easyJet nga Spanja për në Londër u vonua për rreth 12 orë, pasi një pasagjere britanike 89-vjeçare u shpall e vdekur në aeroplan pak para nisjes, duke shkaktuar tronditje në fluturim.
Sipas dëshmitarëve, gruaja u soll në bord me karrocë nga disa anëtarë të familjes së saj, të cilët i thanë stafit se ajo nuk ndihej mirë dhe po flinte. Disa pasagjerë kanë pretenduar se ajo kishte ndërruar jetë përpara hipjes në aeroplan, por këto akuza janë hedhur poshtë nga kompania ajrore.
EasyJet deklaroi se pasagjerja kishte një certifikatë mjekësore që e shpallte të aftë për të fluturuar dhe se ishte gjallë në momentin e hipjes në bord. Sipas kompanisë, vetëm pasi avioni kishte filluar lëvizjen drejt pistës, gruaja kërkoi ndihmë mjekësore dhe fatkeqësisht ndërroi jetë.
Si pasojë e incidentit, avioni u kthye në terminal, pasagjerët u zbarkuan dhe fluturimi u shty për gati 12 orë. Ai ishte planifikuar të nisej në orën 11:15 dhe të mbërrinte në Londër rreth orës 13:10, por u nis vetëm në orën 22:47 me orën lokale, duke mbërritur në Gatwick rreth mesnatës.
Garda Civile spanjolle konfirmoi se oficerët u thirrën në aeroplan për një pasagjere britanike të moshuar, e cila u shpall e vdekur pak pas orës 11:00 të mëngjesit në fluturimin që po përgatitej të nisej nga Malaga për në Londër.
Autoritetet nuk kanë bërë të ditur nëse janë ndërmarrë masa ndaj familjarëve të saj dhe nuk raportohet për arrestime. Gjithashtu, nuk dihet se çfarë ndodhi me trupin e gruas pas nxjerrjes nga aeroplani.
Në një reagim zyrtar, easyJet shprehu ngushëllimet për familjen e pasagjeres dhe theksoi se mirëqenia e pasagjerëve dhe e ekuipazhit mbetet prioriteti kryesor i kompanisë.