Venezuela ka reaguar ashpër ndaj urdhrit të presidentit amerikan Donald Trump për vendosjen e një bllokade ndaj cisternave të naftës që hyjnë dhe dalin nga vendi, duke e cilësuar këtë veprim si një “kërcënim luftënxitës” dhe shkelje të sovranitetit të saj.
Urdhri i Trump parashikon një bllokadë të plotë ndaj anijeve të naftës që janë nën sanksione amerikane, në një kohë kur ekonomia venezueliane varet kryesisht nga eksportet e naftës. Vendimi vjen vetëm pak ditë pasi SHBA-të konfiskuan një cisternë nafte pranë brigjeve të Venezuelës, veprim që ka rritur ndjeshëm tensionet mes dy vendeve.
Në një postim në rrjetin Truth Social, Trump deklaroi se qeveria e presidentit Nicolás Maduro është shpallur organizatë e huaj terroriste, duke e akuzuar për trafik droge dhe trafikim të qenieve njerëzore. Ai pretendoi gjithashtu se Venezuela është e rrethuar nga një prani e madhe ushtarake amerikane, e cila, sipas tij, do të vazhdojë të zgjerohet.
Nga ana tjetër, autoritetet në Karakas akuzojnë Uashingtonin se po kërkon të përvetësojë burimet natyrore të vendit dhe se po përdor presion ushtarak dhe ekonomik për të destabilizuar qeverinë. Presidenti Maduro e cilësoi konfiskimin e cisternës si “vjedhje të anijes dhe rrëmbim të ekuipazhit”.
Sipas të dhënave të TankerTrackers.com, më shumë se 30 anije që ndodheshin ose po i afroheshin Venezuelës javën e kaluar ishin nën sanksione amerikane. Pas këtij operacioni, SHBA-të kanë vendosur sanksione të reja ndaj anijeve dhe bizneseve të lidhura me qeverinë venezueliane.
Ndërkohë, prania ushtarake e SHBA-ve në Detin e Karaibeve është shtuar ndjeshëm, përfshirë vendosjen e aeroplanmbajtëses USS Gerald Ford, më e madhja në botë, pranë territorit venezuelian. Kjo ka shkaktuar reagime edhe brenda SHBA-ve, ku kongresmeni demokrat Joaquin Castro e cilësoi bllokadën detare si “një akt lufte”.
Venezuela, e cila zotëron rezervat më të mëdha të provuara të naftës në botë, vazhdon të refuzojë akuzat e SHBA-ve dhe të theksojë se politikat amerikane po rëndojnë jetën e qytetarëve të saj. Ndërkohë, Kombet e Bashkuara kanë shprehur shqetësim për përkeqësimin e situatës së të drejtave të njeriut dhe rritjen e tensioneve në vend.