Seanca paraprake e parashikuar sot në Gjykatën e Posaçme për dosjen që përfshin ish-presidentin Ilir Meta dhe të bashkëpandehurit e tij është shtyrë për në datën 22 dhjetor.
Shkak i shtyrjes është bërë kërkesa e Metës për t’u njohur plotësisht me fashikujt e hetimit.
Në sallën e gjyqit ishin të pranishëm si Meta, ashtu edhe ish-bashkëshortja e tij, Monika Kryemadhi. Para nisjes së procedurave, Meta ka kërkuar t’i vihen në dispozicion të gjitha materialet e çështjes, duke theksuar se pa u njohur me to nuk mund të vijojë procesi.
“Jeni të lutur të më vendosni në dispozicion materialet. Dua të njihem me fashikujt e hetimit”, është shprehur Meta në sallë.
Pak ditë më parë, ai dorëzoi një kërkesë zyrtare në kryesekretarinë e GJKKO, ku kundërshtonte qëndrimin në kafazin e të pandehurve, duke paralajmëruar se nuk do të pranonte zhvillimin e seancave nëse kërkesa e tij nuk merrej parasysh.
Seanca e radhës do të zhvillohet më 22 dhjetor, ku pritet të vlerësohet nëse palët janë njohur me materialet hetimore dhe nëse mund të vijojë shqyrtimi paraprak.