Planet e presidentit Donald Trump për të blerë Groenlandën mund t’i kushtojnë Shteteve të Bashkuara të Amerikës rreth 700 miliardë dollarë, edhe pse ideja është thellësisht jopopullore mes amerikanëve, sipas “The Independent”.
Presidenti Trump ka deklaruar se do ta marrë territorin danez “në një mënyrë ose në një tjetër”, një pretendim që është hedhur poshtë me forcë nga zyrtarët e Danimarkës dhe të Groenlandës.
Shifra prej 700 miliardë dollarësh është një vlerësim i bërë nga akademikë dhe ish-zyrtarë amerikanë për qëllime planifikimi, dhe përfaqëson më shumë se gjysmën e buxhetit vjetor të Departamentit të Mbrojtjes.
Sipas një zyrtari të lartë të Shtëpisë së Bardhë, sekretarit të Shtetit Marco Rubio i është kërkuar të përgatisë një propozim për blerjen e Groenlandës, i cili pritet t’i paraqitet presidentit në javët në vijim.
Rubio dhe zëvendëspresidenti JD Vance pritet të takohen sot në Uashington me përfaqësues nga Danimarka dhe Groenlanda.
Administrata Trump vazhdon të shtyjë përpara planin për ta futur Groenlandën nën kontrollin amerikan, pavarësisht zemërimit të liderëve evropianë. Ndërkohë, një sondazh i ri tregon se ideja është gjithashtu thellësisht jopopullore brenda SHBA-së. Gati 75 për qind e amerikanëve mendojnë se përdorimi i forcës ushtarake për ta marrë ishullin do të ishte një ide e keqe.
Presidenti Trump ka argumentuar se SHBA-ja ka nevojë për Groenlandën për arsye të sigurisë kombëtare dhe ka paralajmëruar në një postim në Truth Social se, nëse Amerika nuk e merr ishullin, Rusia ose Kina do ta bëjnë këtë.
“Shtetet e Bashkuara kanë nevojë për Groenlandën për qëllime të Sigurisë Kombëtare. Ajo është jetike për ‘Kupolën e Artë’ që po ndërtojmë”, shkroi Trump. “NATO duhet të udhëheqë për ta marrë atë për ne. Nëse nuk e marrim , Rusia ose Kina do ta marrin dhe kjo nuk do të ndodhë”!
Megjithatë, si pas një sondazhi të publikuar sot nga Reuters/Ipsos. mbështetja publike është minimale. Vetëm 17 për qind e amerikanëve miratojnë përpjekjet e Trump për të blerë ishullin e pasur me minerale.
Rreth 47 për qind shprehën kundërshtim, ndërsa 35 për qind*thanë se nuk janë të sigurt. Po ashtu, 71 për qind e amerikanëve, përfshirë nëntë nga dhjetë demokratë dhe gjashtë nga dhjetë republikanë, thanë se përdorimi i forcës ushtarake për ta arritur këtë qëllim do të ishte një ide e keqe. Vetëm 4,0 për qind e konsideruan atë si ide të mirë.
Sondazhi tregoi gjithashtu se 66 për qind e amerikanëve janë të shqetësuar se planet për Groenlandën mund të dëmtojnë aleancën e NATO-s dhe marrëdhëniet e SHBA-së me Evropën.
Zyrtarë të Groenlandës dhe Danimarkës janë të qartë se territori nuk është në shitje.
“Ne nuk jemi në shitje dhe nuk do të aneksohemi”, tha Jess Berthelsen, kryetar i konfederatës kombëtare të sindikatave të Groenlandës, SIK.
Berthelsen shtoi se populli i Groenlandës “nuk i njeh” pretendimet e Trump se territori është i mbushur me anije ruse dhe kineze.
“Pretendimet e tij se ujërat tona janë plot me anije ruse dhe kineze, ne nuk i shohim aspak”, tha ai.