Çmimet e metaleve të çmuara janë rritur ndjeshëm në tregjet ndërkombëtare, pas kapjes së presidentit venezuelian Nicolás Maduro nga Shtetet e Bashkuara, një zhvillim që ka rritur shqetësimet e investitorëve për rreziqet gjeopolitike.
Në tregtimin e mëngjesit të së hënës në Azi, ari u rrit me rreth 1.8%, duke u tregtuar në nivelin 4,408 dollarë për ons, ndërsa argjendi shënoi një rritje prej afro 3.5%. Investitorët po orientohen drejt aseteve të njohura si “strehë të sigurta”.
Ari dhe argjendi kishin arritur nivele rekord gjatë vitit 2025, përpara se të pësonin rënie në fund të vitit. Pavarësisht kësaj, ari regjistroi performancën më të mirë vjetore që nga viti 1979, me një rritje mbi 60%, duke arritur një rekord historik prej 4,549.71 dollarësh për ons më 26 dhjetor.
Sipas analistëve, rritja e çmimeve të arit është nxitur nga pritshmëritë për ulje të mëtejshme të normave të interesit, blerjet masive nga bankat qendrore dhe pasiguritë ekonomike globale.
Në të njëjtën kohë, çmimet e naftës luhatën, ndërsa investitorët po vlerësojnë ndikimin që ndërhyrja e SHBA-ve në Venezuelë mund të ketë në furnizimin global me naftë. Presidenti amerikan Donald Trump ka deklaruar se SHBA-të synojnë të shfrytëzojnë rezervat e mëdha të naftës së Venezuelës, por ekspertët thonë se ndikimi në çmimet e energjisë pritet të jetë i kufizuar në afat të shkurtër.
Sipas specialistëve të industrisë, ringritja e sektorit të naftës në Venezuelë do të kërkonte investime shumë të mëdha dhe kohë, pasi prodhimi aktual përfaqëson vetëm rreth 1% të prodhimit global.
Ndërkohë, tregjet e aksioneve në Japoni, Korenë e Jugut dhe Kinë shënuan rritje, të nxitura më shumë nga zhvillimet pozitive në tregun amerikan dhe sektori i inteligjencës artificiale, sesa nga situata në Venezuelë.