Në qendër të ngjarjeve të fundit në Venezuelë gjendet një grua dhe pavarësisht pritshmërive, nuk bëhet fjalë për fituesen e çmimit Nobel, María Corina Machado, shkruan La Repubblica. Në natën më të trazuar të historisë së vendit, Gjykata Supreme e Venezuelës në Caracas vendosi në bazë të artikujve 233 dhe 234 të kushtetutës që zëvendëspresidentja të bëhet presidente e përkohshme dhe të udhëheqë tranzicionin. Ajo quhet Delcy Rodríguez.
“Bekimi” i Trump
56 vjeçe, vajza e një udhëheqësi marksist të vrarë në burg, ajo u rrit në një mjedis të dominuar nga burrat dhe ia doli të spikaste përmes aftësisë që të përfshihej në biseda me elitën e ekonomisë dhe aktorët e huaj.
Nga studimet te nafta
Rodríguez është nga Caracas dhe studioi për juridik në Universitetin Qendror të Venezuelës. Për mëse 20 vjet, ajo ka qenë një ndër figurat udhëheqëse të Çavizmit. Në kulmin e pushtetit, ka formuar prej kohësh një bashkëpunim të ngushtë me vëllanë e saj, Jorge Rodríguez, president i tanishëm i Asamblesë Kombëtare. Ajo ka shërbyer si ministre e Komunikimit dhe Informacionit gjatë 2013 -2014 dhe më vonë u bë ministre e Jashtme gjatë 2014-2017.
Si kreu i diplomacisë, Rodríguez përfaqësoi Venezuelën në OKB duke ngritur gjithnjë pankartën e kundër-imperializmit. Në 2017 u bë presidente e Asamblesë Kombëtare Kushtetuee. Në 2018, në fillim të mandatit të tij të dytë, Maduro e caktoi si zv/presidente. Rodríguez e mbajti postin edhe gjatë mandatit të tij të tretë që nisi më 10 janar të vitit të shkuar pas zgjedhjeve të kundërshtueshme të 28 korrikut 2024. Gjatë arrestimit të presidentit, ajo mbajti rolin kryesor të autoritetit ekonomik dhe si ministre e naftës.
Funksioni i saj i fundit e vendosi në një pozitë të privilegjuar për negociata. Fakti se pas deklaratës së Trump ajo doli në media e shoqëruar nga vëllai dhe besnikët, Diosdado Cabello dhe Vladimir López Padrino për të rikonfirmuar besnikërinë ndaj Maduro nuk tregon, sipas disa analistëve, refuzim për t’u përfshirë në dialog. “Orët në vijim do të jenë kritike për të përcaktuar nëse zv/presidentja ose anëtarë të tjerë të lëvizjes çaviste do të qëndrojnë në pushtet në marrëveshje me Uashingtonin dhe nëse ka përçarje brenda regjimit”, thotë Renata Segura, drejtoreshë e programit të Amerikës Latine dhe Karaibeve në Grupin e Krizës Ndërkombëtare.