Pas një takimi të rëndësishëm në Paris me presidentin e Ukrainës, Volodymyr Zelensky sot në 6 janar 2026 dhe liderë të tjerë evropianë, kryeministri britanik, Sir Keir Starmer, njoftoi se Britania e Madhe dhe Franca do të jenë të gatshme të dërgojnë trupa në Ukrainë, në rast të arritjes së një marrëveshjeje paqeje me Rusinë.
Ky vendim është pjesë e qëllimit për të krijuar një Forcë Multinacionale për Ukrainën, e cila do të veprojë si një forcë sigurie dhe mbështetjeje për Ukrainën, duke ndihmuar në rindërtimin e forcave të saj të armatosura dhe sigurimin e stabilitetit, pas një marrëveshjeje paqeje.
Starmer gjithashtu theksoi se Bashkimi Evropian dhe Shtetet e Bashkuara janë të angazhuara për të mbështetur Ukrainën në këtë fazë kritike dhe se përpjekjet për paqe janë më afër realizimit se kurrë, por shtoi se sërish, pjesa më e vështirë është ende përpara.
Si pjesë e këtij plani, Britania dhe Franca do të krijojnë qendra ushtarake në Ukrainë, të cilat do të lehtësojnë vendosjen e trupave dhe ndihmën ushtarake pas një armëpushimi të mundshëm. Këto qendra do të ofrojnë gjithashtu mbështetje për rindërtimin e forcave të armatosura ukrainase dhe për forcimin e kapaciteteve të mbrojtjes.
Takimi në Paris u zhvillua gjithashtu në një atmosferë të ndërlikuar diplomatike, pasi në të morën pjesë edhe përfaqësues të administratës amerikane, përfshirë emisarët e presidentit Trump, në një përpjekje për të siguruar mbështetje të qëndrueshme ndërkombëtare për Ukrainën. Në fokus të bisedimeve ishin gjithashtu garancitë e sigurisë. I pranishëm në takim ishte edhe kryeministri shqiptar, Edi Rama.
Presidenti ukrainas Volodymir Zelensky tha në konferencën për mediat se sot është bërë një hap i madh përpara. “Një vit më parë, as që e mendoja këtë. Çdo ditë e më shumë po marrim mbështetje. Do të jemi shumë aleatë bashkë, kur lufta në Ukrainë të marrë fund”, tha Zelensky.
Kancelari gjerman Friedrich Merz tha se bisedimet janë përqendruar në kontributin, që Europa dhe partnerët e saj mund të japin për Ukrainën, pas një armëpushimi. Ai tha se koalicioni pro Ukrainës dëshiron të marrë përgjegjësitë e veta dhe të sigurojë, që Kievi në të ardhmen të ketë Forca të Armatosura të fuqishme, të cilat mund të jenë të forta përballë kërcënimit rus. Ai tha se Gjermania do të vazhdojë ta mbështesë shtetin ukrainas politikisht, financiarisht dhe ushtarakisht.
Takimi dhe deklarata e përbashkët e Starmer dhe Macron në Paris synojnë të krijojnë një mekanizëm sigurie, që do t’i ofrojë Ukrainës mbështetje të qëndrueshme në aspektin ushtarak, ekonomik dhe politik pas një paqeje të mundshme, duke përfshirë gjithashtu edhe koordinimin me SHBA-të për një garanci afatgjatë sigurie për vendin.