Ministri i Mbrojtjes Pirro Vengu ka folur nga Vlora për situatën e zjarrit në malin e e Shën Gjergjit në Dukat, duke garantuar se të gjitha forcat janë në terren për të shuar flakët, që po rrezikojnë më tepër fshatin, por mbetet një kërcënim edhe për parkun kombëtar të Llogorasë.
Vengu thotë se që prej mëngjesit aty ka nisur punën për shuarjen e flakëve edhe helikopteri Cougar i Forcave të Armatosura teksa në terren janë 30 forca zjarrfikëse, por edhe 30 efektivë të ushtrisë krahas shtabit të Emergjencave Civile.
Sipas ministrit Vengu dyshohet se kemi të bëjmë me zjarrëvënie të qëllimshme. Pirro Vengu thotë se situata e zjarrvënieve të qëllimshme është kthyer problem në të gjithë vendin, ndaj paralajmëron se do të merren masa që të mund të vëzhgojnë territoret nga ajri për të evidentuar piromanët të cilët shkaktojnë të tilla situata.
Në fund të fjalës së tij, ministri i Mbrojtjes pati edhe një mesazh për qytetarët, duke kërkuar që të tregohen të kujdesshëm pasi një pakujdesi e tyre rrezikon jetë njerëzish, biznese edhe banesa.
