Bardha Nesturaj, tregtarja e njohur nga tregu i Sarandës e cila përgjatë javës që po lëmë pas ka qenë një ndër më të komentuarat, rezulton të jetë një emër jo i panjohur për qytetin bregdetar.
Përpos tregut, ku dhe prej më shumë se tre dekadash ushtron aktivitetin e saj, Bardha është një emër i njohur edhe në politikën lokale.
Në zgjedhjet e vitit 2015 ajo u kandidua nga Partia Socialiste për në Këshillin Bashkiak. Ky kandidim i zonjës erdhi pas këmbënguljes së Koço Kokëdhimës i cili insistoi që ajo të ishte “zëri” i komunitetit egjiptian në Bashkinë e Sarandës.
“Po t’u bëftë Bardha kurban o Muçi, disa gjëra janë të natyrës. Ato dihen tani”, kjo ka qenë fraza e cila na ka shoqëruar më së shumti përgjatë këtyre ditëve. Gjatë një inspektimi në tregun e perimeve në Sarandë, inspektor Muçu u has me rezistencën e tregtares Bardha Nesturaj e cila prej 1990 shet në ato tezga.
Inspektorit i cili doli rrugëve me urdhër të Edi Ramës, Bardha ia bëri të qartë që s’kishte ku të gjente faturë për rigonin, pasi e kishte mbledhur në malet e Sarandës.
“Jam tregtare që në 1990 dhe më 30 Qershor të këtij viti kam bërë 35 vite që jam tregtare. E kanë filluar prindërit e mi, me ta fillova të punoj, e nisëm me një karrocë, me një makinë më pas dhe kështu u ngrit puna jonë. E kam punën vetëm sepse prindërit më kanë ndërruar jetë.
Dy vëllezërit pësuan infarkt, të dy me bypass. Jam e fortë, pa asnjë shqetësim. Kjo punë më pëlqen, kam pasur oferta për të punuar në biznese private, por më pëlqen kjo. Sa i përket videos virale, është gjë e mirë të shkosh në malet e Sarandës dhe të mbledhësh vetë.
Të vish e të më kërkosh mua kupon, është barrë e rëndë. Unë nuk kam çfarë të marr aty ku e këpus gjënë. S’kam kujt t’i marr certifikim që unë e kam këtë gjë të rregullt dhe të sigurt. Mali e sjell çdo gjë të sigurt e të mirë. Nuk kam çfarë të them unë për këtë gjë.”, tha ajo më herët, ndërkohë që rezistenca e saj i “kujtuan” shtetit ligjin për shitësit ambulantë.
Pas këtij inspektimi, Drejtoria e Përgjithshme e Tatimeve doli me një njoftim sqarues lidhut me aksionin e ndërmarrë prej së hënës për sekuestrimin e produkteve bujqësore e blegtorale që shitet pa faturë.
Tatimet bënë me dije se tregtarët ambulantë nuk kanë asnjë detyrim për të lëshuar faturë dhe për të mbajtur dokumentacion tatimor për mallrat.
Sipas asaj që ligji shqiptar e thotë qartë, këta tregtarë duhet të jetë mbi moshën 16-vjeç të jenë të regjistruar si ambulantë pranë Drejtorisë Rajonale Tatimore, të paguajnë kontributet e sigurimeve shoqërore dhe shëndetësore, tarifën për zënien e hapësirës publike si dhe taksat bashkiake të aplikueshme.
“Administrata Tatimore informon opinionin publik dhe individët e regjistruar si “tregtarë ambulantë” se, bazuar në legjislacionin tatimor në fuqi, nuk kanë detyrim për të lëshuar faturë tatimore dhe as për të mbajtur dokumentacion tatimor për mallrat apo shërbimet që tregtojnë.
Ky përjashtim parashikohet në ligjin nr. 87/2019, “Për faturën dhe sistemin e monitorimit të qarkullimit”, i ndryshuar, konkretisht në nenin 5, pika 1, gërma c). Gjithashtu, ligji nr. 9920, datë 19.05.2008, “Për procedurat tatimore në Republikën e Shqipërisë”, i ndryshuar, në nenin 5, pika 1, gërma j), përcakton qartë statusin dhe kushtet e ushtrimit të aktivitetit të tregtarëve ambulantë”, thuhej ndër të tjera në reagimin e Tatimeve. /Newsbomb.al/