Ministri i Jashtëm i Qipros, Constantinos Kombas, ka qenë i prerë lidhur me skandalin e korrupsionit që po trondit vendin dhe persona të afërt me presidentin Nikos Christodoulides, në një moment të ndjeshëm që përkon me nisjen e presidencës së radhës së Bashkimit Evropian nga Nikozia.
“Nuk do të ndikojë në punën tonë. Ka një hetim në proces dhe politika jonë e jashtme nuk do të ndryshojë”, tha ai, duke shtuar se asnjë shtet anëtar i BE-së nuk ka kërkuar sqarime zyrtare nga qeveria qipriote.
Ambicia e Qipros për këto gjashtë muaj është të shërbejë si “një urë e besueshme” mes Bashkimit Evropian, Lindjes së Mesme dhe brigjeve jugore të Mesdheut. Që nga fillimi i luftës në Ukrainë, Qipro ka mbajtur një qëndrim të fortë në mbështetje të Kievit kundër Rusisë, pavarësisht se Moska mbetet investitori kryesor i huaj në ishull. Sipas Bankës Qendrore të Qipros, kapitali rus i regjistruar në vitin 2024 kalonte 83 miliardë euro, megjithëse ky nivel ka rënë ndjeshëm krahasuar me vitet e mëparshme.
Gjatë një takimi me gazetarë të mediave evropiane, ministri Kombas dha disa shifra konkrete.
“Në janar 2025, asetet ruse të ngrira arrinin në 901 milionë euro nga kompani investimi, 307 milionë euro nga ofrues shërbimesh administrative dhe 90 milionë euro nga entitete të tjera. Mes viteve 2018 dhe 2023 janë mbyllur 42 mijë e 728 kompani guackë dhe 125 mijë e 782 llogari bankare. Depozitat ruse kanë rënë me 87% në periudhën 2015–2024, duke përbërë vetëm 1,5% të depozitave totale në dhjetor 2024”, tha ai.
Në video, Charalambous, së bashku me ish-ministrin e Energjisë, Yiorgos Lakkotrypis dhe drejtorin ekzekutiv të Cyfield Group, Yiorgos Chrysochoose, shfaqen duke ofruar ndikim politik për investitorë të mundshëm në këmbim të parave. Po ashtu, presidenti Christodoulides akuzohet për parregullsi gjatë fushatës zgjedhore të vitit 2023, duke tejkaluar kufirin ligjor prej 1 milion eurosh për shpenzimet elektorale dhe duke marrë fonde të padeklaruara përmes ndërmjetësve, përfshirë familjarë dhe bashkëpunëtorë.
Sipas videos, disa donacione përfunduan në një fond bursash të menaxhuar nga bashkëshortja e presidentit, Philippa Karsera, e cila të dielën dha dorëheqjen. Ajo e quajti videon “një sulm të pamëshirshëm me lajme të rreme dhe akuza shpifëse”, duke shtuar në një postim në Facebook se fakti që është bashkëshortja e presidentit nuk justifikon sulme dhe akuza të pabazuara. Videoja pretendon gjithashtu se persona pranë presidentit ishin të gatshëm, kundrejt pagesave, të ndërhynin në sanksionet evropiane ndaj oligarkëve rusë.
Qeveria e Nikozias e ka cilësuar videon si një sulm keqdashës dezinformimi, me “të gjitha tiparet dalluese” të fushatave të mëparshme ruse kundër vendeve të tjera, duke e quajtur një formë të “luftës hibride”. Të martën, presidenti Christodoulides deklaroi se dorëheqja e Charalambous, i cili është edhe kunati i tij, ishte “një akt besimi në vetvete” dhe jo rezultat presioni apo ndjenje faji.
“Në momente krize si këto, çdo lider që ka duart e pastra duhet të ruajë qetësinë. Unë jam këtu, flas hapur dhe nuk kam asgjë për të fshehur”, tha ai, duke theksuar se ka tolerancë zero ndaj korrupsionit dhe se nuk do të lejojë askënd ta akuzojë për përfshirje në të tilla afera.