Groenlanda, edhe pse një vend i akullt, ndodhet aktualisht mes dy zjarreve, atij diplomatik dhe ushtarak. Presidenti amerikan nuk ka vendosur një afat për blerjen e territorit, por është një përparësi. Këtë e përsëriti zëdhënësja e Shtëpisë së Bardhë, Karoline Leavitt, për gazetarët.
“Presidenti ishte shumë i qartë. Ai tha se dëshiron që Shtetet e Bashkuara të blejnë Groenlandën sepse mendon se nëse nuk e bëjmë këtë, atëherë ajo përfundimisht do të blehet ose ndoshta do të merret në mënyrë armiqësore nga Kina ose Rusia, që nuk është një gjë e mirë për Shtetet e Bashkuara, për Europën dhe as për Groenlandën. Të mos harrojmë se nuk do të ishte vetëm në interesin më të mirë të Shteteve të Bashkuara, por ndoshta do të ishte në interesin më të mirë edhe të Groenlandës të ndahej, të ishte pjesë e Shteteve të Bashkuara dhe e mbrojtur nga Amerika”, tha ajo, përcjell A2.
Qeveria lokale në Groenlandë “në asnjë mënyrë” nuk do të akomodojë dëshirën e shprehur të Shteteve të Bashkuara për të “marrë në zotërim” territorin dhe ka njoftuar qëllimin e saj për të intensifikuar përpjekjet për të siguruar që mbrojtja e ishullit të jetë plotësisht brenda kornizës së NATO-s.
Në një deklaratë, qeveria e Groenlandës tha se “Shtetet e Bashkuara kanë përsëritur edhe një herë dëshirën e tyre për të marrë në zotërim Groenlandën”, duke theksuar se qeveria “nuk mund ta pranojë këtë në asnjë mënyrë”. Megjithatë, presidenti amerikan, Donald Trump, paralajmëroi sëfundmi se marrja e atij territori do të ndodhë me të mirë ose me të keq, ndërsa administrata e tij nuk e ka përjashtuar opsionin ushtarak për të arritur atë qëllim. Ekspertë të shumë e konsiderojnë një zhvillim të tillë si fundin e NATO-s.