Në një intervistë për Euronews Serbia, ndërsa Shqipëria po hyn në muajin e dytë të protestave të përditshme, kryeministri Edi Rama ka zgjedhur t’i lexojë ndryshe ngjarjet në rrugët e vendit. Sipas tij, qytetarët nuk protestojnë sepse janë të pakënaqur me qeverinë, por sepse… jetojnë më mirë dhe kërkojnë edhe më shumë.
“Protesta është diçka shumë më e madhe se vetë tema. Nuk janë vetëm flamingo. Është shumë më tepër se kaq. Është një sinjal se vendi ka kaluar në një nivel tjetër, se zhvillimi është bërë normal, se njerëzit nuk janë më të gatshëm të vuajnë atë që mungon”, tha Rama në intervistë.
Sipas kryeministrit, protestat nuk janë pasojë e krizës, por e suksesit të qeverisë së tij, pasi qytetarët kanë rritur pritshmëritë.
“Njerëzit janë gjithnjë e më pak tolerantë ndaj asaj që mungon. Kjo është arsyeja pse njerëzit duan më shumë. Ata e duan tani. Dhe nuk mund t’i fajësojmë për këtë. Ky është çmimi që paguajmë për suksesin tonë. Kjo, sipas mendimit tim, është një protestë ndaj pritjeve në rritje dhe ne duhet të përballemi me të”, u shpreh ai.
Rama shkoi edhe më tej, duke argumentuar se arsyeja kryesore e protestave është pikërisht fakti se standardi i jetesës është përmirësuar.
“Pavarësisht se si e quajnë njerëzit, pavarësisht se sa ashpër kritikohen në fund të fundit, arsyeja është se njerëzit jetojnë më mirë. Dhe kjo është arsyeja pse ata duan shumë më tepër. Normalisht, shoqëritë e varfra kanë një prag shumë të lartë tolerance për atë që u mungon. Shoqëritë e zhvilluara dhe ato në zhvillim kanë një prag shumë më të ulët të asaj që është e pranueshme. Ata duan atë që mungon”, deklaroi kryeministri.
Në fund të intervistës, kreu i qeverisë u ndal edhe te ndryshimi i mentalitetit mes shoqërive të varfra dhe atyre në zhvillim.
