Presidenti gjerman, Frank-Walter Steinmeier, shpalli të premten shpërbërjen e Bundestagut dhe dekretimin e zgjedhjeve të reja për 23 shkurt, pas dështimit të koalicionit qeverisës të kancelarit Olaf Scholz.
Scholz humbi votëbesimin më 16 dhjetor dhe aktualisht udhëheq një qeveri të pakicës, pasi koalicioni trepartiak, u trondit më 6 nëntor pas shkarkimit të ministrit të financave, në një përplasje mbi mënyrën e rigjallërimit të ekonomisë gjermane.
Steinmeier tha se pas bisedimeve me liderët e partive, ishte e qartë se nuk kishte një marrëveshje për formimin e një shumice të qëndrueshme në parlamentin aktual, prandaj vendosi që zgjedhjet e reja ishin rruga më e mirë për të siguruar stabilitetin dhe qeverisjen e duhur. Ai theksoi se “në kohë të vështira si këto, stabiliteti kërkon një qeveri të aftë të veprojë dhe një shumicë të besueshme në parlament”.
Meqenëse kushtetuta e pas Luftës së Dytë Botërore nuk e lejon shpërbërjen e Bundestagut pa miratimin e presidentit, Steinmeier kishte 21 ditë kohë për të marrë këtë vendim. Pas shpërbërjes së parlamentit, zgjedhjet duhet të mbahen brenda 60 ditëve, dhe liderët e partive kryesore ranë dakord që zgjedhjet të zhvillohen më 23 shkurt, shtatë muaj më herët se sa ishte planifikuar fillimisht.