Presidenti i Shteteve të Bashkuara, Donald Trump, ka paralajmëruar se Uashingtoni është i gatshëm të ndërmarrë veprime të reja ushtarake kundër Iranit, ndërsa paralelisht kërcënoi me reagim të menjëhershëm nëse rebelët Houthi, të mbështetur nga Teherani, tentojnë të bllokojnë lundrimin e anijeve tregtare në Detin e Kuq.
Gjatë një takimi në Shtëpinë e Bardhë me presidentin e Libanit, Joseph Aoun, Trump tha se deri më tani Houthit nuk kanë ndërmarrë hapa për të bllokuar trafikun detar, por theksoi se SHBA do të përgjigjet nëse kjo ndodh.
“Po të ndodhë, do të merremi me të. E kemi bërë edhe më parë me Houthit dhe për një kohë të gjatë nuk kemi dëgjuar më për ta”, u shpreh ai.
Trump komentoi edhe raportimet e Wall Street Journal, sipas të cilave Irani ka zhvendosur uraniumin e pasuruar në një kompleks në zonën e Natanzit, të njohur si Mali Pickaxe, që konsiderohet një nga objektet më të fortifikuara të programit bërthamor iranian.
“Besoj se mund ta kenë bërë, por nuk e kemi konfirmuar zyrtarisht. Nëse materiali ndodhet aty, ka shumë gjasa që ta godasim atë zonë shumë shpejt dhe nuk ka asgjë që mund të bëjnë për ta ndaluar këtë”, deklaroi presidenti amerikan.
Trump përsëriti gjithashtu pretendimin se udhëheqja iraniane kërkon me ngulm rifillimin e negociatave me Shtetet e Bashkuara, por tha se Uashingtoni nuk është i interesuar për bisedime nëse Teherani nuk sjell propozime konkrete.
Presidenti amerikan shtoi se, sipas vlerësimit të tij, Iranit do t’i duheshin “20 deri në 25 vjet” për të rindërtuar kapacitetet e tij ushtarake, ndërsa theksoi se operacionet amerikane “nuk kanë përfunduar ende”.
Duke komentuar sulmin e fundit me raketa dhe dronë ndaj forcave amerikane në Jordani, për të cilin SHBA fajëson Iranin, Trump tha se sulmuesit “arritën të depërtojnë”, duke iu referuar incidentit ku humbën jetën dy ushtarakë amerikanë dhe katër të tjerë u plagosën.
Ai akuzoi gjithashtu Teheranin se po përpiqet të ndikojë në klimën politike në Shtetet e Bashkuara përmes kërcënimeve ndaj lundrimit në Ngushticën e Hormuzit, por theksoi se vendimet e tij nuk varen nga llogaritjet elektorale.
“Unë do të bëj atë që është e drejtë. Nuk mund të mendoj për zgjedhjet kur bëhet fjalë për këtë luftë”, deklaroi Trump.
