Presidenti i Shteteve të Bashkuara, Donald Trump, po përballet me një rënie të fortë të popullaritetit, teksa një pjesë e konsiderueshme e amerikanëve vlerësojnë se paraardhësi i tij, Joe Biden, ka bërë një punë më të mirë në drejtimin e vendit.
Sipas një sondazhi të realizuar nga Harvard CAPS/Harris Poll, 51 për qind e votuesve të regjistruar mendojnë se Trump po performon më dobët se Biden. Një tjetër anketë, e zhvilluar nga YouGov për revistën The Economist, tregon se 46 për qind e të anketuarve e vlerësojnë negativisht presidentin aktual, 40 për qind e mbështesin, ndërsa 7 për qind i konsiderojnë Trump dhe Biden “pak a shumë të njëjtë”.
Edhe Rasmussen Reports, tradicionalisht më pranë qëndrimeve të Trumpit, konstaton rënie të mbështetjes: 48 për qind e të anketuarve besojnë se Biden ka bërë një punë më të mirë si president, ndërsa vetëm 40 për qind zgjedhin Trumpin.
Shtëpia e Bardhë i ka kundërshtuar rezultatet e sondazheve. Zëdhënësi Kush Desai deklaroi se “gati 80 milionë amerikanë i dhanë presidentit Trump një mandat të jashtëzakonshëm për t’i dhënë fund dështimeve në ekonomi dhe krizës së emigracionit”.
Megjithatë, edhe politika kundër emigracionit të paligjshëm, një nga shtyllat kryesore të fushatës së Trumpit, po përballet me kritika në rritje. Sipas një sondazhi të NBC News, 49 për qind e amerikanëve “e kundërshtojnë fuqishëm” mënyrën se si agjencitë e emigracionit trajtojnë emigrantët e paligjshëm.
Rënie është shënuar edhe në perceptimin për menaxhimin e ekonomisë. Sipas analistit Harry Enten për CNN, niveli i besimit ndaj Trump ka rënë me 26 pikë në total dhe me 53 pikë mes votuesve të pavarur, grup që konsiderohet vendimtar në çdo proces zgjedhor.
Ndërkohë, në një zhvillim tjetër, Gallup ka njoftuar se pas afro 90 vitesh nuk do të publikojë më indeksin tradicional të miratimit për presidentin në detyrë. Kompania, e themeluar nga George Gallup në vitin 1938, do të fokusohet në analiza më të thelluara dhe jo në një shifër të vetme të popullaritetit.
Matja e fundit e publikuar nga Gallup në dhjetor e nxori nivelin e miratimit për Trump në 36 për qind, shifra më e ulët gjatë mandatit të tij.
