Pasuria e financierit të diskredituar, Jeffrey Epstein, ka rënë dakord të paguajë deri në 35 milionë dollarë për të zgjidhur një padi kolektive, në të cilën dy nga këshilltarët e tij akuzoheshin për ndihmë dhe bashkëpunim në trafikimin seksual të grave të reja dhe vajzave adoleshente. Lajmi bëhet i ditur në një dokument të depozituar në gjykatë.
Firma ligjore Boies Schiller Flexner, e cila përfaqëson viktimat e Epstein, njoftoi marrëveshjen përmes një parashtrese të depozituar të enjten në gjykatën federale në Manhattan.
Nëse marrëveshja miratohet nga gjykata, ajo do t’i japë fund padisë së ngritur në vitin 2024 kundër ish-avokatit personal të Epstein, Darren Indyke, dhe ish-kontabilistit të tij, Richard Kahn, të cilët shërbejnë si bashkëekzekutues të pasurisë së të ndjerit.
Më herët, pasuria e Epstein kishte krijuar një fond dëmshpërblimi, përmes të cilit janë shpërndarë 121 milionë dollarë për viktimat. Gjithashtu, janë paguar edhe 49 milionë dollarë të tjera në marrëveshje shtesë me viktimat. Sipas një deklarate me e-mail nga avokati i tyre, Daniel Weiner, as Indyke dhe as Kahn “nuk kanë bërë asnjë pranim apo koncesion për sjellje të pahijshme” në kuadër të marrëveshjes së bërë publike të enjten.
“Për shkak se nuk kanë bërë asgjë të gabuar, bashkëekzekutuesit ishin të gatshëm t’i çonin pretendimet kundër tyre deri në gjyq, por ranë dakord të ndërmjetësonin dhe të arrinin një zgjidhje për t’i dhënë fund çdo pretendimi të mundshëm ndaj pasurisë së Epstein”, tha Weiner.
Ai shtoi se marrëveshja do të ofrojë “një rrugë konfidenciale për kompensim financiar” për viktimat që nuk kanë zgjidhur ende pretendimet e tyre ndaj pasurisë.
Jeffrey Epstein vdiq në një burg në New York në gusht të vitit 2019; vdekja e tij u klasifikua si vetëvrasje.
Në padinë e vitit 2024, avokatët e Boies Schiller Flexner pretendonin se Indyke dhe Kahn ndihmuan Epstein të krijonte një rrjet kompleks kompanish dhe llogarish bankare, që i mundësonin atij të fshihte abuzimet dhe të paguante viktimat dhe rekrutuesit, ndërkohë që ata vetë “shpërbleheshin në mënyrë të konsiderueshme” për punën e tyre.
Më herët, kjo firmë ligjore ka ndihmuar në arritjen e marrëveshjeve dëmshpërblyese në vlerë 365 milionë dollarë me bankat JPMorgan Chase dhe Deutsche Bank, pasi i kishte akuzuar ato se kishin injoruar sinjalet paralajmëruese në lidhje me Epstein, i cili dikur ishte një klient fitimprurës për to.