Kryeministri Rama sulmoi kundërshtarët politikë, nga Partinë Demokratike të Sali Berishës e deri te partitë e reja, duke thënë se premtojnë “qilima fluturues” për pensionistët, por nuk do të kenë kurrë gjë në dorë.
“Ne jemi e vetmja forcë politike që do japim dy bonuse për pensionistët në vit. Të tjerët, ata që s’kanë dhe s’do kenë asgjë në dorë, që nga një katran i madh pa din e iman e deri te ca katranë të vegjël pa cipë dhe nishan, ofrojnë për pensionistët qilima fluturues, qilima si trashëgimtarë të denjë të politikës ekonomike të Sudes dhe Xhaferrit”, u shpreh Rama në një videomesazh në Facebook, teksa ishte rrugës për Elbasan, siç tha ai vetë.
“Por pensionistët nuk e harrojnë se kush e bëri Shqipërinë lesh e li, e dinë aritmetikën më mirë sesa Lulat e rinj dhe e kanë më të qartë se kushdo tjetër që ne nuk jemi më të mirët, por më të mirë se ne ky vend as ka pasur dhe as nuk gjen dot për nja dhjetë vjet të tjera pa diskutim”.
