Presidenti Joe Biden dënoi të hënën vendimin e Gjykatës së Lartë, e cila vendosi se presidentët kanë një imunitet absolut nga ndjekja penale për aktet kryesore zyrtare dhe lëshoi një paralajmërim të ashpër për një mandat të dytë të mundshëm për ish-presidentin Donald Trump.
“Nuk ka mbretër në Amerikë. Secili prej nesh është i barabartë para ligjit. Askush, askush nuk është mbi ligjin, madje as presidenti i Shteteve të Bashkuara”, tha Biden në një fjalim nga Shtëpia e Bardhë.
Ai e cilësoi vendimin e gjykatës një precedent të rrezikshëm në dëm të popullit amerikan.
“Me vendimin e sotëm të Gjykatës së Lartë për imunitetin presidencial, kjo ndryshoi rrënjësisht. Për të gjitha qëllimet praktike, praktikisht nuk ka kufizime për atë që mund të bëjë presidenti. Është një parim thelbësisht i ri dhe është një precedent i rrezikshëm, sepse pushteti i zyrës nuk do të kufizohet më nga ligji, madje duke përfshirë edhe gjykatën supreme të Shteteve të Bashkuara.”
Në vendimin e së hënës, Gjykata e Lartë u shpreh se ish-presidentët kanë imunitet absolut nga hetimet për veprimet e tyre zyrtare, si dhe asnjë lloj imuniteti për veprimet jozyrtare, një vendim që njeh për herë të parë një lloj imuniteti presidencial nga hetimi.
Presidenti Biden po kandidon për një mandat tjetër përballë kundërshtarit Donald Trump dhe ka qenë kritik ndaj veprimeve të rivalit të tij në lidhje me sulmin e 6 janarit 2021 ndaj Kapitolit nga mbështetësit e zotit Trump.
Këto ishin deklaratat e tij të para në Shtëpinë e Bardhë, pas debatit të parë presidencial me zotin Trump, ku paraqitja e tij, e cila u cilësua si e dobët, nxiti thirrjet që ai të tërhiqej nga gara.
/a.r