Klasa e re drejtuese e Rusisë po formohet në brigjet e liqenit Senezh, rreth 40 kilometra në veriperëndim të Moskës. Aty shtrihet një kampus prej 85 hektarësh, me hotele, palestra dhe rezidenca të rrethuara nga pyje.
Në hyrje të kampusit ndodhet një tabelë e thjeshtë me drita të kuqe: “Punëtoria e administrimit”. Këtu po përgatitet ajo që Vladimir Putin e quan “elita e re” e Rusisë. Të gjithë pjesëmarrësit janë veteranë të luftës në Ukrainë.
Programi nisi më 1 mars 2024. Dy ditë më parë, gjatë fjalimit para Asamblesë Federale, Putin kishte deklaruar se ushtarakët që ktheheshin nga shërbimi duhej të merrnin poste drejtuese në sektorë të ndryshëm të vendit.
Shkolla e elitës së re
Mësimet zhvillohen nga zyrtarë të Kremlinit dhe qeverisë, përfaqësues të ministrive, drejtues rajonalë dhe drejtues të kompanive të mëdha.
Programi përbëhet nga katër module, secili 30 ditë, dhe zgjat gjithsej 2 vjet.
Ai organizohet nga Shkolla e Lartë e Administrimit Publik, pjesë e Akademisë Presidenciale të Ekonomisë Kombëtare dhe Administratës Publike në Moskë. Institucioni është nën kontrollin e drejtpërdrejtë të Kremlinit.
Interesi ishte i jashtëzakonshëm që në fillim. Vetëm gjatë tre orëve të para të regjistrimit u paraqitën më shumë se 6 mijë aplikime. Në total, gjatë marsit dhe prillit 2024, numri i aplikimeve kaloi 44 mijë.
Por vendet ishin të kufizuara.
Më 16 maj u përzgjodhën 83 pjesëmarrës: 79 oficerë karriere, nga togerë deri te gjeneralë, tre ushtarë dhe katër gra. 20 prej tyre kishin marrë titullin “Hero i Rusisë”.
Kursi i parë nisi më 27 maj. Vetëm tri ditë më vonë, pjesëmarrësit hipën në akullthyesin “50 vjetori i Fitores” dhe u nisën drejt Polit të Veriut, ku iu nënshtruan testeve për “qëndrueshmërinë fizike dhe morale”.
Pas kthimit, ata u pritën nga Putin. Presidenti u tha se, pas përfundimit të trajnimit, i cili përfshinte edhe praktika në Dumë, do të kishin mundësinë të zgjidhnin mes vazhdimit të karrierës në Forcat e Armatosura ose kalimit në administratën civile.
Për një nomenklaturë të vjetër dhe të konsoliduar rreth pushtetit të Putinit, “Koha e Heronjve” nuk është thjesht një mundësi karriere. Është një rrugë e drejtpërdrejtë drejt posteve të rëndësishme.
Në fund të janarit 2025, 18 nga 83 pjesëmarrësit e grupit të parë kishin marrë tashmë poste në administratë.
Mes tyre ishte Artyom Zhoga, ish-komandant i batalionit “Sparta” në Republikën e Donetskut dhe përfaqësues i Putinit gjatë zgjedhjeve presidenciale të vitit 2024. Ai u emërua përfaqësues fuqiplotë i presidentit në rajonin e Uraleve. Edhe të tjerë përfituan poste të rëndësishme.
Artur Orlov, major dhe komandant i një batalioni tankesh, u bë kryetar i bordit të organizatës rinore ruse “Lëvizja e të Parëve”.
Ndërsa Vladislav Golovin, komandant toge në brigadën 810 të marinsave të Flotës së Detit të Zi, u emërua shef shtabi i Yunarmiya, organizatës rinore paraushtarake që promovon edukimin patriotik.
Të zgjedhurit e rinj
Zgjedhjet e fundit për Dumën dhe këshillat rajonalë treguan se kjo prirje po zgjerohet.
49 ish-ushtarakë u zgjodhën deputetë, dhe më shumë se gjysma e tyre kishin kaluar përmes programit në liqenin Senezh.
Në total, më shumë se 120 pjesëmarrës të “Kohës së Heronjve” kanë marrë poste të reja.
Putin i ka përshëndetur ata, duke thënë se përvoja e tyre do të jetë e vlefshme për hartimin e vendimeve të ardhshme.
“Përvoja e heronjve tanë është shumë e kërkuar dhe rezultatet e votimeve e kanë konfirmuar qartë këtë”, deklaroi ai.
Politologu Andrei Kolesnikov e sheh këtë “elitë të re” si pjesë të konsolidimit të një “shteti të forcës” në Rusi. Ndërsa kolegu i tij, Nikolaj Petrov, argumenton se autoritetet po përpiqen të tregojnë se “hegjemoni i ri përfaqësohet nga pjesëmarrësit e operacionit special ushtarak”.
Akuzat për krime lufte
Krijimi i “Kohës së Heronjve” fillimisht u interpretua si një goditje ndaj elitës liberale ruse, të cilën Putin e kishte kritikuar për mungesë patriotizmi gjatë luftës.
Por tani, militarizimi i elitës politike ruse duket se po shndërrohet në një sistem më të gjerë. Dhe kjo mund të japë një ide mbi drejtimin që Kremlini synon të ndjekë në vitet e ardhshme.
Të paktën 13 pjesëmarrës të programit akuzohen nga autoritetet ukrainase për krime lufte.
Mes tyre është edhe Artyom Zhoga, i cili dyshohet se ka torturuar dhe ekzekutuar disa të burgosur në Donbas.
Në listë janë edhe dy persona të dekoruar me titullin “Hero i Rusisë”: togeri Nursultan Mussagaleev dhe majori Boris Dudko. Autoritetet ukrainase i lidhin ata me masakrën e Buchas. Në Rusinë e Putinit, megjithatë, këto akuza nuk i kanë penguar ata të ngjiten në poste të rëndësishme.