Eldi Dizdari, i njohur gjithashtu me emrin Denis Matoshi dhe me pseudonimet “Alduth” e “Shqiptari i gjatë”, është ekstraduar nga Emiratet e Bashkuara Arabe drejt Belgjikës, ku do të vuajë dënimin me 10 vite burgim të dhënë nga drejtësia belge. 37-vjeçari, i konsideruar nga autoritetet si një prej figurave kryesore të kartelit shqiptar të kokainës “Kompania Bello”, u arrestua në Dubai dy vite më parë pas një kërkese ndërkombëtare për ekstradim.
Sipas të dhënave zyrtare, udhëtimi i tij u realizua nën masa të rrepta sigurie me mbërritje në aeroportin ushtarak të Melsbroek, nga ku u transferua menjëherë në një institucion penitenciar belg. Gjykata e Antwerp-it e ka dënuar Dizdarin me 10 vite burgim, gjobë prej 80 mijë eurosh, si dhe konfiskim të përfitimeve kriminale në vlerën e 7.5 milionë eurove në kuadër të dosjes “Yaramis”, e cila lidhet me trafikun e kokainës nga porti i Antwerp-it.
Hetimet e autoriteteve belge zbuluan se pas dobësimit të grupit “Yaramis” nga konfliktet e brendshme, Dizdari bashkëpunoi me eksponentë të tjerë për organizimin e nxjerrjes së ngarkesave të mëdha të lëndëve narkotike. Veçmas, prokuroria belge po trajton një tjetër procedim për dy transporte parash të kryera gjatë viteve 2020-2021 në interes të Dizdarit, me një vlerë totale prej 1.75 milionë eurosh.
Emri i tij është i njohur edhe për strukturat e SPAK në Shqipëri për lidhjet me “Kompania Bello”, ku Gjykata e Posaçme e Apelit ka lënë në fuqi sekuestrimin e pasurive të tij. Ekstradimi u konfirmua edhe nga ministrja belge e Drejtësisë, Annelies Verlinden, e cila vlerësoi bashkëpunimin me Emiratet e Bashkuara Arabe si një hap kyç në goditjen e krimit të organizuar ndërkombëtar.