Gjykata e Apelit e Juridiksionit të Përgjithshëm ka vendosur të ndryshojë masën e sigurisë për Erdion Muhon, i cili ishte arrestuar më herët për përfshirje në një ngjarje kriminale.
Sipas vendimit të fundit, masa e “arrestit me burg” është zëvendësuar me atë të “arrestit në shtëpi”.
Muho akuzohet për bashkëpunim në tentativën për shkatërrimin me lëndë plasëse të anijes “Finikas”.
Gjatë kësaj tentative ndodhi një shpërthim tritoli, ku për pasojë humbi jetën biznesmeni Armandi Nelaj, i dyshuar si një nga bashkëpunëtorët në këtë ngjarje.
Ngjarja, e cila tronditi opinionin publik, dyshohet se ka ndodhur për motive konkurrence në sektorin e transportit detar, ku anija “Finikas” operonte prej kohësh.
Ngjarja
35-vjeçari Muho, pronar i një agjencie turistike në qytetin bregdetar, që operon edhe në fushën e transportit ndërkombëtar detar të udhëtarëve të linjës Sarandë – Korfuz, së bashku me viktimën, Armend Nelaj kishin planifikuar të vendosnin lëndën plasëse te njëra nga anijet që operon në linjën Sarandë-Korfuz, për motive konkurrence.
Por, lënda plasëse ka shpërthyer aksidentalisht gjatë tentativës për ta transportuar dhe vendosur në anije. Për pasojë humbi jetën 52-vjeçari Armand Nelaj.
Hetimi ka nisur pas ngjarjes së ndodhur në orën 22.00 të datës 24 Qershor te vitit te kaluar, në afërsi të Portit Detar Sarandë, ku shpërthimi i një sasie ekplozivi i mori jetën 52-vjeçarit Armand Nelaj, biznesmen në fushën e makinerive të ndërtimit.
Nga hetimet dyshohet që Nelaj atë natë po afrohej në kalatën e Portit për të vendosur një sasi eksplozivi në një nga tragetet e linjës Sarandë-Korfuz, por në rrethana ende të paqarta eksplozivi shpërtheu aksidentalisht. Prokuroria dyshon se bashkëpunëtor i Nelajt ishte pikërisht Erdion Muho.