Të gjithë e mbajnë mend nga “Big Brother VIP Albania 2”, por Luiz Ejlli rikthehet sonte në televizion në një tjetër rol. Shkodrani do të jetë në qendër të një formati të ri televiziv, të titulluar “Live me Luizin”, që nis transmetimin këtë mbrëmje në Top Channel.
Programi do të ndërthurë intervistat me personazhe të njohur, muzikën live, humorin dhe lojërat, duke e vendosur Luiz Ejllin këtë herë në rolin e moderatorit. Pak orë para premierës, drejtuesja ekzekutive e Top Channel, Sara Hoxha, ka ndarë emocionet për rikthimin e saj në një projekt me Luizin, disa vite pas bashkëpunimit të tyre të mëparshëm.
“Pas disa vitesh rikthehem të punoj me Luizin, por këtë herë në një dimension tjetër, siç publiku nuk e ka parë më parë”, shkruan Hoxha, duke falënderuar edhe ekipin e Top Channel që ka punuar prej javësh për realizimin e formatit.
Postimi nuk i ka shpëtuar Luizit. Ai ka reaguar duke e falënderuar Sarën për besimin, por në fund ka lënë edhe një tjetër “kunj”, duke shtuar kureshtjen për atë që do të ndodhë në ekran:
“E di ti çfarë ndodh me mua kur dal në televizor.”
E ftuara e parë e Luizit do të jetë Alketa Vejsiu, ndërsa formati do të nisë sonte në orën 21:00 në Top Channel.