Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet paraprake për 14 pjesëtarë të një grupi të strukturuar kriminal, ndërsa ka arritur të hedhë dritë mbi disa ngjarje të rënda kriminale, mes tyre edhe një tentativë për vrasjen e Durim dhe Valter Bamit.
Të pandehurit e çështjes janë:
Astrit Avdyli (alias Astrit Balliu, alias Astrit Sulejmani): I hetuar me masën e sigurisë “Arrest në burg”. Akuzohet për:
Sigurimi i kushteve dhe mjeteve materiale për kryerjen e vrasjes së Durim Bamit dhe Valter Bamit.
Pjesëmarrje në grup të strukturuar kriminal.
Mbajtje pa leje të armëve dhe municioneve luftarake.
Ndihmë për kalim të paligjshëm të kufirit.
Futje e sendeve të ndaluara në institucionin e vuajtjes së dënimit.
Emiljano Shullazi: I hetuar me masën “Arrest në burg” dhe i akuzuar për:
Organizim dhe drejtim të grupit të strukturuar kriminal.
Sigurimi i kushteve për kryerjen e vrasjes së Durim dhe Valter Bamit.
Sulme ndaj familjarëve të një zyrtari shtetëror.
Futja e sendeve të ndaluara në institucionin e vuajtjes së dënimit.
Naim Stafuka: I hetuar me masën “Arrest në burg”, i akuzuar për:
Pjesëmarrje në grup të strukturuar kriminal.
Sigurimi i mjeteve për kryerjen e vrasjeve të planifikuara.
Blerim Abazi (alias Blerim Gashi): I hetuar me masën “Arrest në burg”, i akuzuar për:
Pjesëmarrje në grup të strukturuar kriminal.
Sigurimi i kushteve dhe mjeteve për kryerjen e vrasjeve.
Sipas SPAK, të pandehurit Astrit Avdyli, Emiljano Shullazi, dhe Blerim Abazi nga janari deri në korrik 2020, si dhe Naim Stafuka gjatë gushtit 2020, kanë bashkëpunuar në sigurimin e mjeteve për të kryer vrasjet e Durim dhe Valter Bamit. Hetimet kanë dokumentuar aktivitetin e tyre kriminal, të zhvilluar në kuadër të një grupi të strukturuar.
Sakaq, dosja është dorëzuar pranë Gjykatës së Posaçme Kundër Korrupsionit dhe Krimit të Organizuar, e cila do të vendosë për datën e nisjes së gjyqit.
