Kina po i jep informacione të inteligjencës Rusisë për të ndihmuar në kryerjen e sulmeve më të sakta me raketa në Ukrainë. Kështu ka deklaruar një zyrtar i lartë i inteligjencës ukrainase.
Oleh Alexandrov, zyrtar në Agjencinë e Inteligjencës së Jashtme të Ukrainës, i tha agjencisë shtetërore Ukrinform se Kina po i kalon Rusisë të dhëna satelitore mbi objektiva, përfshirë edhe ato që kanë përfituar nga investime të huaja.
“Ka prova për një nivel të lartë bashkëpunimi mes Rusisë dhe Kinës në kryerjen e zbulimeve satelitore mbi territorin e Ukrainës, për të identifikuar dhe më pas analizuar objektiva strategjikë për t’u goditur,” tha ai. “Siç kemi parë muajt e fundit, këto objekte mund të jenë pronë e investitorëve të huaj.”
Forcat ajrore të Ukrainës deklaruan të dielën në mëngjes se i gjithë vendi ishte nën kërcënimin e sulmeve të reja raketore nga Rusia, pas disa orësh alarmesh ajrore dhe paralajmërimesh për sulme me dronë dhe raketa. Kryetari i Lvivit, Andriy Sadovyi, tha se raketat po afroheshin në qytetin perëndimor, rreth 70 km nga kufiri me Poloninë, pasi mbrojtja ajrore ukrainase ishte angazhuar rëndë për të zmbrapsur një sulm me dronë rusë.
Polonia ngriti në ajër avionë luftarakë të dielën në mëngjes pas sulmeve ajrore në Ukrainën perëndimore.
“Avionët polakë dhe aleatë po veprojnë në hapësirën tonë ajrore, ndërkohë që sistemet tokësore të mbrojtjes ajrore dhe zbulimit me radar janë në gatishmërinë më të lartë,” thuhet në një postim të komandës operacionale të Polonisë në X.
Sipas shërbimit të gjurmimit të fluturimeve Flightradar24, fluturimet komerciale po përdorin rrugë që zakonisht aktivizohen kur aeroportet e Lublinit dhe Rzeszow-it pranë kufirit me Ukrainën janë të mbyllura.
Lituania pezulloi trafikun ajror në aeroportin e Vilnius-it për shkak të dyshimeve për praninë e tullumbaceve në hapësirën e saj ajrore të shtunën, dhe fluturimet u devijuan në Poloni dhe Letoni. Lituania, që është një mbështetëse e fortë e Ukrainës, kufizohet me Bjellorusinë me një vijë kufitare prej 679 km, një aleate e ngushtë e Rusisë. Kjo ngjarje vjen pas shfaqjeve të dronëve dhe ndërhyrjeve ajrore në aeroportet e Kopenhagës dhe Mynihut javët e fundit.
Një “sulm i kombinuar” rus vrau një grua dhe plagosi gjashtë persona të tjerë në qytetin Zaporizhzhia, sipas guvernatorit të rajonit juglindor ukrainas Ivan Fedorov. Ai tha se një vajzë 16-vjeçare ishte mes të plagosurve që morën ndihmën mjekësore pas sulmit.