Presidenti i SHBA-së, Donald Trump, u tërhoq të dielën nga kërcënimi i tij për të vendosur tarifa prej 50% mbi importet nga Bashkimi Evropian. Ai pohoi se kishte patur dje, një bisedë telefonike me Presidenten e Komisionit Eropian, Ursula Von Der Leyen, dhe pas saj ka rënë dakord të zgjasë afatin deri më 9 korrik, duke i lënë kohë bisedimeve midis Uashingtonit dhe bllokut prej 27 vendesh për të arritur një marrëveshje.
Trump njoftoi të premten një tarifë prej 50% nga 1 qershori, pasi bisedimet me BE-në nuk po ecnin mjaftueshëm shpejt. Kërcënimi trazoi tregjet financiare globale dhe intensifikoi një luftë tregtare që është shoqëruar me ndryshime të shpeshta në politikat tarifore ndaj partnerëve dhe aleatëve tregtarë të SHBA-së.
Sipas Trump, Von der Leyen i tha gjatë bisedës se BE-së i duhej më shumë kohë për të arritur një marrëveshje.
“Patëm një telefonatë shumë të këndshme dhe unë pranova ta shtyja vendimin,” u tha Trump gazetarëve para se të kthehej në Uashington pas një fundjave në Neë Jersey.
“Ajo tha se do të takohemi shpejt dhe do të shohim nëse mund të gjejmë një zgjidhje.”
Von der Leyen tha në një postim në X se pati një “bisedë të mirë” me Trump dhe se BE ishte gati të vepronte shpejt.