Presidenti amerikan Donald Trump ka zhvilluar sërish një bisedë telefonike me kryeministrin izraelit Benjamin Netanyahu, në kulmin e tensioneve të fundit mes Izraelit dhe Iranit.
Shtëpia e Bardhë konfirmoi kontaktin mes dy liderëve, duke bërë të ditur se kjo është telefonata e dytë e zhvilluar brenda rreth 24 orëve, pas shkëmbimit të sulmeve mes dy vendeve.
Ende nuk janë bërë publike detajet e plota të bisedës, ndërsa një zyrtar i administratës amerikane i tha AFP-së se komunikimi mes Trump dhe Netanyahu vjen në kuadër të përpjekjeve për të frenuar përshkallëzimin e konfliktit në Lindjen e Mesme.
Sipas të njëjtit burim, situata është qetësuar përkohësisht pas presionit të ushtruar nga presidenti amerikan, ndërsa Uashingtoni vijon angazhimin diplomatik për të shmangur një përplasje më të gjerë në rajon.
Telefonata e re mes Trump dhe Netanyahu zhvillohet në një moment delikat, kur ndërkombëtarët po bëjnë thirrje për vetëpërmbajtje dhe respektim të armëpushimit.
