Presidenti amerikan Donald Trump i ka dhënë një paralajmërim të fundit Hamasit për të pranuar kushtet e tij për t’i dhënë fund luftës.
Trump nuk specifikon cilat janë termat dhe kushtet, megjithëse disa nga detajet janë raportuar më herët sot. Por Trump thotë se Izraeli i ka pranuar ato.
“Të gjithë duan që pengjet të jenë në shtëpi. Të gjithë duan që kjo luftë të përfundojë! ”, shkruan Trump ndërsa shton se “është koha që Hamasi të pranojë [kushtet e mia] gjithashtu, ” “
“Kam paralajmëruar Hamasin për pasojat e mos pranimit. Ky është paralajmërimi im i fundit. Nuk do të ketë një tjetër, ” tha Trump.
Trump ka lëshuar një ultimatum gati identik më parë, sidoqoftë, duke kërcënuar Hamasinnë një postim në mars ku pretendoi se ishte paralajmërimi i tij “i fundit. ”
Aktualisht ka 48 pengje në Gaza — afërsisht 20 prej të cilëve besohet të jenë akoma gjallë.
Ndërkaq, më herët, ministri i Jashtëm i Izraelit, Gideon Saar, deklaroi se lufta në Gaza mund të përfundojë nëse lirohen pengjet dhe grupi militant palestinez Hamas çarmatoset.
Këto komente Saar i bëri gjatë një konference për shtyp në Jerusalem, ku ai u takua me homologun e tij danez, në një kohë kur tensionet në rajon mbeten të larta dhe bisedimet për një armëpushim vazhdojnë të jenë të ndërlikuara. Deklarata e Saar vjen një ditë pasi Hamasi përsëriti qëndrimin e tij të kahershëm se do të lirojë të gjithë pengjet nëse Izraeli bie dakord për t’i dhënë fund luftës dhe për të tërhequr forcat e tij nga qyteti i Gazës.
Kjo kërkesë e Hamasit ka qenë një pikë kyçe në negociatat e ndërmjetësuara ndërkombëtarisht, por deri më tani, palët nuk kanë arritur një marrëveshje. Deklaratat e Saar vijnë kur në Tel Aviv dhe Jerusalem janë zhvilluar protesta masive ku mijëra izraelitë dolën në rrugë për të kërkuar lirimin e pengjeve të mbetur dhe përfundimin e luftës.
Protestat, ndër më të mëdhatë në muajt e fundit, u zhvilluan pranë rezidencës së Kryeministrit Benjamin Netanyahu, ku familjarët e pengjeve dhe mbështetësit e tyre shprehën zemërimin e tyre ndaj qeverisë për mungesën e përparimit në negociata.