Të paktën tre në katër vende të botës do të kenë një popullsi në tkurrje nga mesi i shekullit për shkak të uljes së normës së lindshmërisë, sugjeron një hulumtim.
”Dhe deri në vitin 2100, më shumë se 97% e vendeve – 198 nga 204 – do të kenë norma të lindshmërisë nën atë që është e nevojshme për të mbajtur madhësinë e popullsisë me kalimin e kohës”, sipas një studimi të botuar në ”The Lancet”.
Analiza në studimin e barrës globale të sëmundjeve, dëmtimeve dhe faktorëve të rrezikut parashikon që Afrika Subsahariane do të përbëjë një në çdo dy fëmijë të lindur në planet deri në fund të shekullit.
Ndërkohë në Evropën Perëndimore, shkalla totale e fertilitetit – numri mesatar i fëmijëve të lindur nga gratë në moshë riprodhuese – parashikohet të jetë 1,44 në 2050, duke zbritur në 1,37 në 2100.
Në MB, shkalla totale e lindshmërisë ishte 2,19 në 1950, duke rënë në 1,85 në 1980 dhe më pas në 1,49 në 2021. Kjo është shumë më poshtë se norma prej 2,1 e nevojshme për të mbajtur një popullsi të qëndrueshme pa imigrim të konsiderueshëm.
Deri në vitin 2050, norma totale e lindshmërisë në Mbretërinë e Bashkuar parashikohet të jetë 1,38 për të rënë në 1,30 deri në vitin 2100. Studiuesit thanë se gjetjet paraqesin “sfida serioze” për rritjen ekonomike globale, veçanërisht në mes të një fuqie punëtore në tkurrje dhe plakjes së popullsisë.
Ata thanë se për vendet me shkallë të ulët të lindshmërisë, politikat sociale si leja prindërore e zgjeruar, kujdesi falas për fëmijët dhe të drejtat shtesë të punësimit mund të ofrojnë një nxitje të vogël, por shumica e kombeve do të mbeten nën nivelet e nevojshme për të mbështetur popullsinë e tyre.
Analiza parashikon se Nigeri do të mbajë vendin e parë në vitin 2050 për shkallën më të lartë të fertilitetit, me një mesatare prej pesë fëmijë për çdo grua, por kjo mund të zbresë në 2,7 fëmijë nëse përmbushen objektivat e arsimit universal.
Koreja e Jugut do të kishte shkallën më të keqe të lindshmërisë nga mesi i shekullit me 0,82 fëmijë për femër, sipas analizës. Shkalla e përgjithshme e fertilitetit global është më shumë se përgjysmuar gjatë 70 viteve të fundit, nga rreth pesë fëmijë për çdo grua në vitin 1950 në 2,2 fëmijë në vitin 2021, thanë studiuesit./ atsh
