Detaje të reja kanë dalë në dritë nga operacioni i zhvilluar në Portin e Durrësit, ku Policia sekuestroi 41 kilogramë e 350 gramë lëndë të dyshuar narkotike kokainë.
Droga u zbulua gjatë kontrollit të një kontejneri me origjinë nga Brazili, i cili sipas dokumentacionit shoqërues transportonte mish pule. Gjatë kontrollit, efektivët gjetën 37 paketime me lëndë të dyshuar narkotike, të fshehura në kapakët e jashtëm të kontejnerit. Vlera e kokainës së sekuestruar përllogaritet në rreth 2 milionë euro.
Sipas raportimit të ‘MCN’, kompania që kishte porositur ngarkesën me mish pule është “AMG Food”, me administrator/pronar Arben Goxhaj.
Kompania rezulton e lidhur me ngarkesën tregtare që transportohej në kontejnerin ku u zbulua kokaina. Megjithatë, në këtë fazë nuk ka të dhëna zyrtare që provojnë se kompania apo përfaqësuesit e saj kishin dijeni për lëndën narkotike të fshehur në kontejner.
