Presidenti Donald Trump ka bërë të ditur se SHBA ka nisur një “sulm të fuqishëm dhe vdekjeprurës” kundër grupit Shteti Islamik (ISIS) në Nigerinë veriperëndimore.
Në një postim në platformën e tij Truth Social, Trump shkruan se “Sonte, sipas udhëzimeve të mia si Komandant i Përgjithshëm, Shtetet e Bashkuara nisën një sulm të fuqishëm dhe vdekjeprurës kundër llumit terrorist të ISIS-it në Nigerinë Veriperëndimore , të cilët kanë synuar dhe vrarë mizorisht, kryesisht, të krishterë të pafajshëm, në nivele të papara për shumë vite, madje edhe shekuj! kam paralajmëruar më parë këta terroristë se nëse nuk do të ndalonin masakrën e të krishterëve, do të kishin ferrin për të paguar, dhe sonte, ndodhi. Departamenti i Luftës ekzekutoi sulme të shumta perfekte, siç janë të afta të bëjnë vetëm Shtetet e Bashkuara”, shkruan ai.
Komanda e Afrikës e ushtrisë amerikane tha se sulmi u krye në shtetin Sokoto në koordinim me autoritetet nigeriane.
Trump më parë ka thënë se do të nisë një ndërhyrje ushtarake amerikane “të fuqishme” në Nigeri, duke pretenduar se qeveria e vendit ka qenë e pamjaftueshme në përpjekjet e saj për të parandaluar sulmet ndaj të krishterëve nga grupet islamike.
Nigeria është zyrtarisht një vend laik, por popullsia e saj është e ndarë pothuajse në mënyrë të barabartë midis myslimanëve (53%) dhe të krishterëve (45%). Dhuna kundër të krishterëve ka tërhequr vëmendje të konsiderueshme ndërkombëtare, veçanërisht midis të djathtës fetare në Amerikë, dhe shpesh është cilësuar si përndjekje fetare.