Presidenti amerikan Donald Trump ka akuzuar Kombet e Bashkuara për një “sabotim të trefishtë”, pas një sërë incidentesh të pazakonta që shoqëruan fjalimin e tij në Asamblenë e Përgjithshme të OKB-së.
Në një postim në rrjetet sociale, Trump shkruan se “një turp i vërtetë ndodhi në OKB”, duke listuar jo një, por “tre ngjarje shumë të dyshimta” që sipas tij synonin të prishnin momentin e tij në skenën globale.
Sipas presidentit amerikan, gjithçka nisi me ndërprerjen e papritur të shkallëve lëvizëse që do të transportonin atë dhe Zonjën e Parë, Melania Trump, në hyrjen e selisë së OKB-së.
“Ishte një moment i rrezikshëm, mund të binim përpara me fytyrë mbi hekurat e ashpër të shkallëve”, tha Trump.
Më pas, gjatë fjalimit nga podiumi i famshëm me mermer të gjelbër, mikrofoni i tij u fik papritur.
“Mendova me vete: së pari shkallët, tani kjo…Çfarë vendi është ky?”, është shprehur ai.
Por sipas Trump, sabotimi nuk mbaroi këtu.
Pas fjalimit, ai e pyeti bashkëshorten për performancën e tij, dhe Melania iu përgjigj:
Nuk dëgjova asgjë nga ato që the!
“Kjo nuk ishte rastësi, ishte sabotim i trefishtë në OKB“, theksoi Trump, duke kërkuar hetim urgjent dhe ruajtjen e të gjitha pamjeve të sigurisë.
OKB reagoi për incidentin me një sqarim zyrtar. Sipas zëdhënësit Stéphane Dujarric, një kameraman i delegacionit amerikan që ecte mbrapsht mbi shkallë për të filmuar çiftin presidencial, mund të ketë prekur pa dashje butonin e emergjencës, duke ndalur mekanizmin.
Pamjet filmike tregojnë momentin kur shkallët u ndalën papritur, duke e detyruar Melania Trump të fillonte të ngjitej në këmbë, e ndjekur nga presidenti.
Megjithatë, Trump nuk e pranoi këtë shpjegim. Ai madje citoi një artikull të “The Times of London”, ku përmendej se disa punonjës të OKB-së kishin bërë shaka se “do ta ndalonin shkallët dhe do t’i thoshin se nuk kishte më fonde”. “Ata që e bënë këtë duhet të arrestohen!” shkroi presidenti.
Pavarësisht këtyre episodeve, Trump nuk kurseu sulmet ndaj vetë Organizatës së Kombeve të Bashkuara.
Në një fjalim të ashpër, ai vuri në pikëpyetje qëllimin e ekzistencës së saj dhe paralajmëroi Evropën se nëse nuk kufizon migracionin, vendet e saj do të shkojnë drejt shkatërrimit.
Ndërkohë, zëdhënësja e Shtëpisë së Bardhë, Karoline Leavitt, e quajti incidentin “një përpjekje të qëllimshme për të poshtëruar presidentin dhe Zonjën e Parë” dhe paralajmëroi “masa për ata që qëndrojnë pas këtij akti”.