Në Gjykatën e Apelit të Posaçëm po zhvillohet procesi ndaj të pandehurit Festim Bexhdilit, i dyshuar për rrëmbimin dhe zhdukjen e Jan Prengës.
Bexhdili ishte dënuar me burg përjetë, por vendimi u prish nga Gjykata e Lartë dhe cështja u kthye për rigjykim.
Gazetarja e Klan News, Glidona Daci, e cila po ndjek seancë, ka mësuar se avokati i Festim Bexhdilit, Ilir Murati, kërkoi të pyeten bashkë të pandehurve Aldo Majnishta dhe Dritan Rexhepi.
Nga ana tjetër, Prokuroria e Posaçme kundër Korrupsionit dhe Krimit të Organizuar pretendon se Bexhdili ka patur në përdorim një celular të enkriptur me programin EncroChat, por që nuk është zbërthyer.
Por vetë Bexhdili pretendon se nuk e ka përdorur këtë aplikacion. Avokati i tij thotë se janë zbërthyer komunikimet në SKY ECC dhe Altin Hajri nuk ka komunikime me Festim Bexhdilin.
Gjatë seancës, avokati kërkoi thirrjen e një eksperti që të interpretojë pamjet filmike, si dhe kërkoi pyetjen e një shtetaseje të identifikuar si Enxhi.
Prokurorja e SPAK, Elida Kaçkini, deklaroi se janë sekuestruar dy celularë gjatë arrestimit të Bexhdilit, njëri prej tyre është i enkriptuar.
“Avokati po tenton te shmangë faktin se Bexhdili ka përdorur telefon të enkriptuar në një kohe që ne si prokurori e kemi të provuar që e ka përdorur. Këtë e pranon dhe deshmitarja Enxhi e cila është lidhje shoqërore e Bexhdilit. Bexhdili është pjesë e grupit kriminal dhe nuk është gjendur rastësisht në vendin apo kohën e gabuar”, tha prokurorja.
“Ekspertojeni telefonin dhe na sillni prova, të sqarohet nëse Bexhdili ka apo jo komunikime, për të krijuar bindje të plotë duhen prova të reja. Duhet zbërthyer telefoni dhe të konfirmohet nëse ka ose jo komunikime”, u kundërpërgjigj avokati.
Ndërsa Gjykata e Apelit të Posaçëm rrëzoi kërkesën e avokatit për të pyetur dëshmitaren Enxhi, gjithashtu nuk pranoi as marrjen e një eksperti IT që të interpretojë pamjet filmike. Por pranoi që t’i vendosë në dispozicion pamjet filmike avokatit mbrojtës.
Po kështu, Apeli i GJKKO urdhëroi shoqërimin e Aldo Majnishtës dhe Dritan Rexhepit të cilët do të pyeten në procesin ndaj Bexhdilit, në seancën e radhës më datë 12 Qershor.