Kreu i Partisë Sociliste, Edi Rama, ditën e sotme ka zhvilluar një takim me banorët e Fushë Krujës, ku ka prezantuar arritjet kyçe për sektorët më të rëndësishëm dhe sfidat e Shqipërisë 2030 në BE. Në fjalën e tij, Rama vuri theksin te përmbyllja e rindërtimit për familjet e prekura nga tërmeti i vitit 2019 dhe projektet infrastrukturore që do të lidhin zonën me Tiranën.
Edi Rama: Shumica e atyre familjeve që u goditën nga tërmeti ishin familje më pak të forta dhe më shumë të varfëra. Sot ne kemi përmbyllur të gjitha detyrimet tona me shpërndarjen e 350 apartamentve të fundit, që kanë mbetur për shkak se respektuam këtë periudhë zgjedhore që ka disa rregulla të caktuara. Këto apartamente do të shpërndahen menjëherë pas zgjedhjeve. Arrijmë në një total prej 1100 shtëpish së reja, më të bukura, dhe mbi të gjitha falas për të gjitha ato familje.
Ne jemi në kushtet kur mund ta vëmë dhe e kemi vënë në planin tonë atë ëndrrën e vjetër të gjithë Krujës, për të pasur një rrugë të drejpërdrejtë që e lidh me Tiranën. Tani rruga e drejpërdrejtë është pjesë e programit tonë, ashtu sikundër nuk ka nevojë për të qenë në ndonjë program afatgjatë, sepse dhe rrugën lidhëse mes Fushë-Krujës dhe Krujës, do të duhet ta riveshim brenda një kohe të arsyeshme. Ajo që planifikohet të bëhet nuk është një manifest dëshirash elektorale, por është një plan i vendosur mbi themele shumë të forta.
