Arritja e një marrëveshjeje me homologun kinez Xi Jinping, është shumë e vështirë për Presidentin e Shteteve të Bashkuara, Donald Trump. Teksa pritej që dy liderët të bisedonin këtë javë, në mes të tensioneve të krijuara, Shtëpia e Bardhë duket se është tejet pesimiste. Sekretari i Thesarit të SHBA, Scott Bessent, ka deklaruar se për shkak të një bllokade tregtare të krijuar mes shteteve, bisedimet janë shumë të nevojshme.
“Më pëlqen Presidenti Xi i Kinës, gjithmonë më ka pëlqyer, por ai është kaq i vështirë për të arritur në një dakordësi”, ka shkruar Trump në platformën e tij Truth Social.
Washingtoni dhe Pekini kanë fajësuar njëri-tjetrin për shkeljen e një marrëveshjeje tregtare të arritur në Zvicër më 12 maj. Marrëveshja përfshinte një pezullim 90-ditor të shumicës së tarifave, si dhe shfuqizimin e gjerë të kundërmasave tregtare nga Kina kundër SHBA-së të vendosura që nga fillimi i prillit. Kina nuk i ka lehtësuar kufizimet mbi eksportet e metaleve të rralla, në kundërshtim me atë që Washington priste. Po ashtu e ka kritikuar SHBA-në për kufizimin e aksesit në teknologjinë e avancuar.
Jo më larg se javën e shkuar, administrata Trump njoftoi se do të fillojë edhe revokimin e vizave për studentët kinezë. Trump dhe Jinping folën për herë të fundit në janar 2025, pak para se presidenti i SHBA-së të betohej për mandatin e tij të dytë. Ndërsa Trump shprehet i gatshëm për të komunikuar me liderin e Kinës, pritet të shohim nëse do ketë të paktën një telefonatë mes tyre.