Kërcënimi i Donald Trump për të tërhequr mbështetjen e SHBA-së dhe për t’u larguar nga bisedimet e paqes Rusi-Ukrainë ka ngritur alarm në Kiev, duke përgatitur terrenin për atë që zyrtarët dhe ushtarët ukrainas presin të shndërrohet në një ofensivë të përgjakshme ruse gjatë verës që mund të riformësojë trajektoren e luftës, citon prestigjiozja britanike Financial Times.
Ndërsa udhëheqësit e Ukrainës vazhdojnë përpjekjet e tyre për një armëpushim 30-ditor, shumë njerëz nuk kanë asnjë iluzion se lufta disavjeçare e Rusisë do të përfundojë së shpejti, thanë zyrtarë dhe ushtarë ukrainas për Financial Times.
Ata argumentojnë se Rusia nuk tregon shenja të reduktimit të sulmeve të saj ushtarake apo të bërjes së lëshimeve të vërteta. Një takim i kohëve të fundit në Turqi, thanë ata, i la negociatorët e Kievit të bindur se paqja mbetet një perspektivë e largët.
Atje, negociatori kryesor i Rusisë paralajmëroi se ata mund të pushtonin përsëri dhe të kapnin rajonet veriore të Sumy dhe Kharkiv të Ukrainës, sipas një zyrtari ukrainas.
Edhe qeveritë evropiane kanë qenë të ngadalta në veprimin ndaj premtimeve për të forcuar sigurinë, përfshirë një “forcë sigurie” të propozuar që ende nuk është materializuar dhe disa në Kiev shqetësohen se mund të mos realizohen kurrë.
Yehor Firsov, një deputet dhe komandant i njësisë së dronëve në Brigadën e 109-të të Ukrainës, tha se është koha që vendi i tij të përballet me “realitetin e ashpër” se vetëbesimi i Rusisë mund të zgjasë më shumë se uniteti perëndimor.
“Putini është i bindur se mund ta shkatërrojë Ukrainën”, tha ai. “Ai thjesht beson se kapitullimi ynë i plotë është vetëm çështje kohe… SHBA-të mund ta ndalojnë ndihmën e tyre çdo ditë. Ai e sheh Evropën si të dobët dhe të pavendosur.”
Trupat ukrainase në frontin lindor thanë se këmbësoria ruse po lëviz me motoçikleta, karroca dhe skuterë elektrikë. Ismahilov, një ushtar i cili dikur ishte klerik i lartë mysliman i Ukrainës, tha se ata janë “një tufë karkalecash… jo një valë e madhe, por një rrjedhë e pafundme”.
“Ata nuk interesohen për humbjet. Ata thjesht vazhdojnë të vijnë… jo për të marrë kilometra, por metra – llogore të rrënuara, disa pemë të shpërthyera, rrënojat e një shtëpie.”
Ukraina humbi një nga avionët e saj F-16 në mesin e majit gjatë një misioni ajror, me piloti që u nxor nga avioni pasi rrëzoi tre objektiva. Shumë ushtarë dhe, gjithnjë e më shumë, zyrtarë thonë se vendi duhet të përgatitet për një luftë të gjatë dhe asimetrike.