Një 52 vjeçar grek, përdorues i rrjeteve sociale është arrestuar pasi është paditur se ka kërcënuar Ministrin grek të shëndetësisë Ádhonis Georgiádis.
Ky i fundit ka paraqitur një padi kundër përdoruesit të platformës X, me emrin “Christos Sidiropoulos”, pasi u bë shënjestër e kërcënimeve në internet.
Sipas njoftimit të bërë nga vetë ministri përmes një postimi, disa përdorues të rrjetit e sulmuan duke përdorur imazhe të linçimit të një zyrtari të Nepalit. Një prej tyre, me profilin “Christos Sidiropoulos”, kaloi kufijtë e tolerancës dhe për pasojë u padit nga Georgiádis.
Padia çoi në arrestimin e personit, që akuzohet për nxitje në kryerjen e veprave penale, kërcënim dhe fyerje të përsëritura përmes internetit ndaj një personi politik.
“Liria e fjalës është e panegociueshme, por si çdo e drejtë, vjen bashkë me përgjegjësinë. Përgjegjësinë për të ditur kufijtë midis lirisë sonë dhe dinjitetit e lirisë së tjetrit”, theksoi Georgiádis. Ai shtoi se nuk kërkon ndëshkim për hakmarrje, por sepse “nuk duhet të lejojmë që dhuna dhe toksiciteti të mbizotërojnë në shoqërinë tonë”.
Policia greke, përmes Departamentit të Krimit Kibernetik, konfirmoi se pas një hetimi të thelluar u identifikua personi që menaxhonte llogarinë në fjalë dhe u arrestua në qytetin e Nausës. Tashmë ai është dërguar para autoriteteve kompetente.
Ngjarja ka zënë një vend të rëndësishëm në mediat greke , në një moment kur reagimet për vrasjen e aktivistit konservaotr Charlie Kirk japin e marrin.
“Kritika, sa të doni. Por shpifje dhe kërcënime, këtu mbarojnë”, shkroi ministri në përfundim të deklaratës së tij.
Ádhonis Georgiádis është një politikan grek i shquar i Demokracisë së Re që ka shërbyer në disa poste qeveritare. Ai njihet për stilin e tij të fortë retorik, shpesh polemizues, dhe për angazhimin e tij në debatet publike mbi çështje politike, ekonomike dhe shoqërore duke u bërë një nga figurat më të spikatura dhe mediatikisht më aktive të kosnervatorëve greke.